Jackson Chambai Ikeh, ari Wong Besi Saratok ti bulih midul emas ba Sukma Ke-20

SARATOK: Penyulut atlit tinju Sarawak, Jacksom Chambai Ikeh ba Lumba Malaysia (Sukma) Ke-20 ngemegahka rayat nengeri tu kelebih agi peranak Saratok empu.Kaban Parlimen Saratok, Datuk Ali Biju madahka diri temegah ati meda igat Jackson, peranak asal Wong Besi, menang midul emas ba kategori Fly 48-51 kilogram (kg).

Ku iya, penyulut Jackson nya dikearap ulih nyadi peransang ngagai nembiak bukai nempa pemujur ba sebarang pengawa dikerinduka sida.

“Tabi puji ngagai igat Jackson ti udah mai nama Tanah Kenyalang enggau Saratok pegari ba main tinju sekali tu ti diatur ba Kompleks Futsal Malaysia Presint 18.

“Kitai chukup temegah ati meda iya mujur meri emas ngagai kontinjen Sarawak pengudah ngalahka atlit Wilayah Persekutuan, Mohamad Hakimi Sumadi, menang 5 – 0.

“Kitai meda pengeransing, pemerani enggau pengering dibantaika Jackson tu enda nyalah baka semangat bujang berani ti nurun ngayau kelia,” ku iya.

Nya alai ku Ali, igat Jackson tau bendar nyadi chunto enggau peransang ngagai rebak nembiak kelebih agi sida ti rinduka main tinju ari menua nya.

Nya alai iya meransang bala nembiak anang enggai ngiga palan latih lumba enggau main nitihka pengerindu sida ngambi penau nya ulih diansah.

“Tabi puji mega ngagai jurulatih Joseph Harry ti udah mujur nempa enggau matih atlit tinju kitai tu lalu mujur mai midul emas ngagai Sarawak enggau Saratok.

“Kitai ulih nempa atlit ti nyulut baka igat Jakcson tu asil latih ke chukup, disiplin, embing enggau ajar ari jurulatih tinju.

“Terima kasih sekali agi ngagai nuan unggal Joseph Harry ti mujur ngembing Jackson tu dataika iya ulih nempa nama ba main tinju,” ku iya temegah.

Suara Sarawak