Abang Johari (duduk, tiga kiba) rambau bejadika ‘Sebauh Rural High Speed Open Broadband Network’ di Rumah Layuh KM20 Jalai Ulu Segan ditu, kemari.

BINTULU: Urung 63 buah rumah panjai di Sebauh deka ngasaika penyamai pengudah bulih servis bungkur arus penyambung nengah projek ‘Sebauh Rural High Speed Open Broadband Network’.

Premier Sarawak Datuk Patinggi Tan Sri Abang Johari Tun Openg madahka penatai internet ngagai rumah panjai nya dikeandal ulih ngemujurka sebarang transaksyen digital peranak ba menua pesisir.

“Aku empu deka datai meda arus internet di Sebauh, aku datai endang nadai meri notis seraya bisi nemuai ngagai pelilih Bintulu.

“Sebedau tu, aku enggau bala bakih udah ngemendarka agih belanja RM13.5 juta bagi nyambung internet ba Sebauh, aku empu deka meda efektif tauka enda, betul tauka enda, tadi aku meda semua perambu kami amai,” ku iya.

Abang Johari bejaku munyi nya rambau bejadika ‘Sebauh Rural High Speed Open Broadband Network’ di Rumah Layuh Muyang KM20 Jalai Ulu Segan ditu, kemari.

Kelimpah ari nya, Abang Johari mega madahka iya empu deka meda peneras arus internet ti udah dipasang ba palan nya.

“Tadi aku bemain telefon, umbas iya peneras arus internet.

“Tabi puji ngagai kita di Sebauh laban ulih ngasaika arus internet kelebih agi ungkup 63 buah rumah panjai ditu enggau raban sekula ti beguna ke servis tu.

“Kelimpah sekula, Opis Pelilih Menua Sebauh mega nguna servis nya, reti iya Rumah Layuh diatu udah ulih bekaul enggau Opis Pelilih Menua Sebauh,” ku iya.

Nangkan nya, Abang Johari madahka Perintah Sarawak deka ngaga sebuah mesin ATM di Opis Pelilih Menua Sebauh ungkup rayat ba sitak nya.

“Kitai mega bisi Sarawak Pay, nyema anak deka ngirum duit ke apai isi aja ngagai akaun Sarawak Pay, anjung terus terima.

“Baka nya mega enti apai deka ngirum duit ngagai anak sekula lebuh deka meri duit belanja tauka meli bup laban diatu internet pemadu beguna,” ku iya.

Adun Gedong nya madahka, nyema perambu tu mujur iya deka ngaga pekara ti sebaka ba Pelilih Menua Baram.

“Sebauh tu kira palan pemungkal dulu, kitai nguji dulu, tang meda gaya baka ti mujur meh.

“Terima kasih ngagai Kaunsil Multimedia Sarawak (SMA) enggau pengari rayat ditu laban udah bebendar mantu rayat,” ku iya.

Dulu ari nya, Menijar Besai SMA Dr Zaidi Razak madahka, Perintah Sarawak ngambi singkang ti berani mai projek tu di Sarawak.

“Di Semenanjung nadai bisi serikat ti deka mai ‘fiber connection’ ngagai menua pesisir.

“Bungkur internet nya deka meri pemaik ngagai 63 buah rumah panjai di Sebauh,” ku iya.

Sama bisi datai Menteri Betanam Betupi Moden Enggau Pemansang Kandang Menua Datuk Seri Dr. Stephen Rundi Utom, Kaban Parlimen Bintulu Datuk Seri Tiong King Sing enggau bala bukai.

Suara Sarawak