UNGKUP ALBUM… Abang Johari begambar ungkup kenang enggau bala pengajar sereta nembiak SK Ulu Segan.

BINTULU: Sekula Primari (SK) Ulu Segan deka nyadi model pemansang sekula ba sitak bukai di menua tu.

Premier Sarawak Datuk Patinggi Tan Sri Abang Johari Tun Openg madah, tu beduduk ari konsep sereta pelin begunan sekula nya baka kolej tauka palan pelajar tinggi.

Ku iya, naka diatu, bedau bisi sekula di menua tu ngena konsep baka ba sekula nya.

Abang Johari madah, iya deka nganjung gambar pelin begunan sekula nya ngagai Menteri Pelajar Malaysia nyadika malin.

“Tu mih standard sekula Sarawak ke mesti dikemansang Opis Menteri Pelajar di Kuala Lumpur,” ku iya.

Abang Johari mansutka jaku nya ba aum pemberita pengudah ngabas begunan baru SK Ulu Segan, lemai kemari.

Pia mega ku iya, Sapit Premier Datuk Amar Douglas Uggah Embas enggau Menteri Utiliti ke mega Adun Sebuyau, Datuk Julaihi Narawi mega deka ngena konsep ke sebaka dikena numbuhka sekula ba sitak sida.

Abang Johari andalka nembiak deka bulih pelajar ke menyana lebuh disediaka librari ti disikap bup pemadu baru.

Iya andalka pengudah sekula nya tembu ila, begunan sekula tiga ringkat enggau 12 bilik kelas ulih nyendiaka palan ti lantang enggau likun ngagai nembiak lebih agi sida ti belajar ba begunan sekula lama enggau suah napi penusah bah sebedau tu.

Abang Johari mega andalka begunan sekula nya ila deka nyadi peransang bala pengajar enggau nembiak ransing agi ba pengawa ngajar enggau belajar.

Nambahka nya, Abang Johari madah pengawa ngaga baru begunan SK Ulu Segan tu dipejalai beduduk ari palan sekula nya enda likun ketegal suah napi penusah bah.

“Nitihka penerang, penusah bah udah ngamahka begunan sekula nyengkaum buding lalu bisi mega madah, bisi jelu tama ke sekula lalu pekara tu udah tentu ngeruga pengelikun nembiak,” ku iya madah nyemetak.

Ku Abang Johari, pemutus ngaga baru sekula nya dipejalai berindik ari pejalai iya enggau Adun Jepak, Datuk Talib Zulpilip ngabas sekula nya kena Februari 2018.

Pengawa ngaga baru 12 bilik kelas nya nyengkaum blok opis dua ringkat, blok akademik tiga ringkat, kuarters pengajar, buding, dewan makai, kantin enggau langkau jaga.

Bisi mega tadika, rumah engkah uras, jalai beperabung, palan begempuru enggau gelanggang bemain sereta entepan ensikal beperabung beungkus RM26,184,472.57 tu dipelanja Perintah Sarawak.

MODAL MENSIA… Abang Johari begambar enggau nembiak SK Ulu Segan ke nganti penatai iya ngagai sekula nya.

Suara Sarawak