Status quo PRU nadai berubah

KUCHING: Gempung Parti Sarawak (GPS) ngetanka status quo bebagika penuduk parlimen entara parti komponen iya maya Pengawa Bepilih Besai (PRU) ke deka datai.

Chairman iya, Datuk Patinggi Tan Sri Abang Johari Tun Openg madah, pengawa bebagika penuduk ungkup empat parti komponen gempung nya nadai berubah baka PRU-14 ke dulu.

“Ya, kami mengkang ngetanka status quo laban kami GPS semampai ngenuluka Sarawak.

TUAI KITAI… Abang Johari (tengah) disempulang ari kiba, Datuk Seri Alexander Nanta Linggi, Datuk Amar Douglas Uggah Embas, Datuk Seri Dr. Sim Kui Hian, Datuk Amar Awang Tengah Ali Hasan enggau raban GPS bukai datai ba Aum Supreme Kaunsil Parti GPS di BCCK, malam tadi.

“GPS tu siti tim, nya kebuah pengawa bebagika penuduk entara parti komponen mega mudah (ngaga pemutus bebagika penuduk).

“Bol udah din, semina nganti maya ditendang aja,” ku Abang Johari.

Abang Johari ke mega Presiden Parti Pesaka Bumiputera Bersatu (PBB) mansutka jaku nya ba aum pemberita pengudah betuaika Aum Supreme Kaunsil Parti GPS di Palan Aum Borneo Kuching (BCCK), malam tadi.

PBB ti megai GPS diatu bisi 13 Kaban Parlimen, tiga agi parti komponen GPS iya nya Parti Rakyat Sarawak (PRS) ti ngembuan dua penuduk, Parti Demokratik Progresif (PDP) mega bisi dua penuduk lalu Parti Sa’ati Rayat Sarawak (SUPP) bisi siti penuduk.

Suara Sarawak