MIRI: Pengudah dua hari dipenyadi turu belanja dikena mantu pengawa bebuntas tudah Rebecca Rayam Robson, ke napi penanggul tungkul, mujur tegumpulka RM40,000 naka pukul 1 ngalih hari tadi.

Sapit Menteri Dagang Temuai Industri Kreatif Seni Pemerindang 1, Datuk Sebastian Ting madah, turu nya nyapai perambu tumu iya nya RM35,000.

“Aku meri terima kasih ngagai semua rayat Miri ke udah siru meri pupu bantu belanja dikena nangkup ungkus bebuntas tudah Rebecca di Institut Jantung Negara (IJN) Kuala Lumpur,” ku iya sehari tu tadi.

UDAH CHUKUP..Sebastian Ting ngenuku ke penyampau turu ungkup mantu pengawa bebuntas Rebecca Rayam Robson ketegal penanggul tungkul atau udah chukup lalu iya deka bekejang ke Kuala Lumpur, pagila (1 Oktober).

Kenu ku Adun Piasau nya, pemeri ari mensia mayuh diterima nengah akaun Sehati
Service & Information Centre lalu enggau nya, pengawa ngumpul turu nya udah diketu pengudah perambu nya mujur dijapai.

“Kami deka ngenuku ke udah nerima penyampau turu belanja RM40,000 iya nya ngeluie ari diperambu tumu RM35,000, nya alai kami ngemaduka pengawa ngumpul turu ari mensia mayuh,” ku iya.

Rebecca Rayam Robson, tiga taun napi penanggul tungkul atau dikumbai ‘Total Anomalous Pulmonary Venous Drainage’ (TAPVD) iya nya penanggul tungkul atau kongenital.

Anak mit tu ditemu napi penanggul TAPVD maya berubat Influenza A di Sepital Miri kena 4 Ogos tu tadi.

Bekau ari ungkus berubat ti kelalu mar sereta enda ulih bebayar, sida sebilik bisi ngelawa Sebastian Ting kena Hari Tiga ngambika ulih dibantu belanja.

Apai ngagai anak pengkuan tiga diri menyadi nya semina gawa nyadi mekanik ditangkan bini iya semina gawa ba rumah.

Sebastian Ting berasai dikangau mantu ruang bilik nya pengudah iya nemu pengaji ngagai apai Rebecca begunaka bantu lengkas.

“Turu belanja ari mensia mayuh nya deka dikena ngatur semua ungkus bebuntas lalu aku deka mantu sida ba Kuala Lumpur ila pasal atur ba IJN,” ku iya.

Suara Sarawak