KUCHING: Pengawa nirika tower Telekomunikasyen Menua Pesisir (SMART) Kaunsil Multimedia Sarawak dipelaba tembu sereta dibuka penuh ujung taun tu, ku Menteri Utiliti enggau Telekomunikasyen Datuk Julaihi Narawi.

Kenu ku iya, naka tu Sarawak udah ngaga 284 ari 600 tower telekomunikasyen baru dibaruh SMART dikena nyendiaka bungkur internet laju ungkup timpuh panjai ngagai semua komuniti di selampur nengeri.

“Nya alai, raban kami merambu deka nyikap tower nya enggau dibuka penuh ujung taun tu.

Julaihi begambar kenang enggau bala bukai ba palan bejadika Pavilion Kaunsil Multimedia Sarawak (SMA) nyerumba Smart Nation Expo 2022 di Palan Dagang Enggau Eksibisyen Entarabansa Malaysia (MITEC), Kuala Lumpur, Hari Dua.

“Semua tower baru tu deka disikap enggau perengkaguna ti ngemendarka bekunsi penyambung enggau pengatur, ngena Pugu Bemacham Pengatur Teknologi Penyambung (MOCN), ti keterubah di Malaysia,” ku iya.

Iya madah munyi maya ngarika Premier Sarawak Datuk Patinggi Tan Sri Abang Johari bejadika Pavilion Kaunsil Multimedia Sarawak (SMA) nyerumba Smart Nation Expo 2022 ba Palan Dagang enggau Eksibisyen Entarabansa Malaysia (MITEC), Kuala Lumpur, Hari Tiga.

Tandu iya, Sarawak benung chakah bejalaika Sarawak Linking Urban Rural and Nation (SALURAN) ti ngemeratka juluk ngelanjarka japai sambung 4G nengah pengawa ngemanahka infrastruktur ke bisi diatu enggau ngerembaika bungkur telekomunikasyen ke selampur nengeri nyengkaum ngagai menua pesisir.

“Ungkup tuju nya mega, Sarawak udah mujur masang kabel ‘gentian optik’ sepanjai 130 kilometer (km) nyadika bukti pemanah rikod dikena nyendiaka sambung internet laju ngagai 7,000 iku rayat ba menua pesisir di Sebauh, Bintulu.

“Projek tu nyadi pelin ungkup sitak menua pesisir di nengeri tu. Kelimpah ari nya, kitai mega udah mujur masang 250 Terminal Apertur Pemadu Mit (VSAT) nyadika pemutar sementara nyendiaka sambung internet ngagai komuniti menua pesisir.

“Nyentuk diatu, naka 90,000 penguna ngasaika pemaik ari inisiatif tu,” ku iya.

Kelimpah ari nya ku iya, nengah projek Sambung Jalur Lebar Menua Pesisir Sarawak (MySRBN), bisi 168 palan udah disikap enggau servis pemadu manah besambungka sitak ke kurang bulih servis.

“MySRBN deka disambung mungkur taba bukai nyengkaum tower SMART ke udah tembu.

“Simpul iya, tu endang dikena mandangka pengeransing Perintah Sarawak dikena nentuka nadai siku orang tinggal ari ngasaika ubah digital enggau dikena mandangka pemanah juluk besai kitai enggau ungkup pengidup digital nengeri tu dudi hari,” ku iya.

Suara Sarawak