KUCHING: Sepenyampau 120 iku nembiak ari Akademi Kaunsil Pemansang Industri Pengawa Berumah (CIDB) Wilayah Sarawak enggau CIDB Tech udah mujur nembuka latih sida nerima Setipikit Kompetensyen Penau Berumah (SKKP) CIDB, kemari.

Menteri Kanan Kereja Raya Datuk Seri Fadillah Yusof madahka industri pengawa berumah entara industri pemadu besai ngagai pemansang ekonomi di Malaysia enggau Sarawak.

“Seriris enggau juluk ati perintah nengeri ti deka nyapai status nengeri mansang ba taun 2030, Perintah Sarawak udah ngulurka belanja peransang modal penyampau RM100 bilion manggai taun 2028 dikena ngatur pemansang pemun baka jalai raya, jematan, bekal ai enggau kuasa karan sereta renyatan arus penyambung.

“Peluang manah dalam sektor pengawa tu ba Sarawak endang besai ke alai peluang nya patut direbut semua nembiak ti udah nembuka latih,” ku iya.

Teks jaku Fadillah dibacha Sapit Menteri Pemansang Mengeri Enggau Pengeraja Asal Datuk Len Talif Salleh rambau Program Konvokesyen Akademi Kaunsil Pemansang Industri Berumah (CIDB) Wilayah Sarawak di Palan Aum CIDB Sarawak ditu kemari.

ARAP TERUS MAJU…Datuk Len Talif Salleh (kiba) nyuaka setipkit Anugerah Nyulut ngagai siku nembiak ABM enggau CIDB Tech Sarawak Region ke baru graduet rami-rami ba CIDB Convention Centre in Petra Jaya, Kuching. -Gambar: Mohd Alif Noni

Ku iya, perintah ngatur mayuh strategi dalam ngelakuka program Latih Teknikal enggau Vokasional (TVET) nyadi sebengkah chap, nambahka kualiti enggau numbuhka pengkalan data bekaul awakka nangkup peminta pengawa ti setipak.

“Pengawa nyeruri dalam akreditasyen, aku enggau setipikit program TVET mesti dikemanah dalam nyapai nembiak ti udah tembu Sijil Pelajaran Malaysia (SPM) tama ngagai program TVET ba taun 2025.

“Naka diatu, tikas nembiak ti udah pansut ari Palan Pelajar Tinggi (IPT) enggau Institusyen TVET Perintah udah nyapai 86.7 peratus, tu siti kelai ti manah,” ku iya.

Iya nangkan nya ngelalau bala nembiak ngambika nguna peluang enggau ruang ti diberi dalam nambahka peneleba sida.

Ku iya, CIDB endang andal ulih ngemansutka mayuh agi bala orang dagang, kontraktor tauka raban bepenau ti disikap menyana ari nengeri Sarawak. –INDUN SILONG

Suara Sarawak