SIMANGGANG: Ulah Parti Demokratik Progresif (PDP) ti enda bebasaka sempekat dalam Pengawa Bepilih Besai Nengeri (PRN) Ke-12 suba udah enda ngelantangka ati Perikatan Nasioanal (PN) Sarawak.

Tuai Raban Nembiak Bersatu (Armada) Parti Pribumi Bersatu Malaysia (Bersatu) Sarawak, Alexander Frusis madahka tu berindik ari sekeda ketuai PDP di Dun Krian ti enda bebasaka sempekat PRN12 tu suba.

“Ba dalam sempekat PRN12 suba, Datuk Ali Biju ari PN dipinta ngelepaska penuduk lalu meri awak ngagai PDP bediri ba sitak Krian.

ALEXANDER FRUSIS

“Naka tu, sekeda ketuai ari PDP udah ngemansutka penemu minta PDP nganjung chalun bediri ba Parlimen Saratok taja enda ngena lambang Gempung Parti Sarawak (GPS).

“Diberitaka mega, sida iya sanggup nguna lambang PDP dikena neruska juluk ati ti deka bediri ba Parlimen Saratok,” ku Alexander.

Ku iya, ulah sekeda tuai PDP ke bakatu endang enda ulih diterima laban udah bulaka semaya ti udah bisi dalam sempekat maya PRN12 suba entara PN enggau GPS.

“Nya alai, PN Sarawak deka nganjung chalun ba sekeda penuduk dipenggi komponen GPS tang ukai bediri ba penuduk Parti Pesaka Bumiputera Bersatu (PBB) ba Pengawa Bepilih Besai (PRU) Ke-15 tu.

“Pia mega, PN Sarawak enda nyalahka Premier Sarawak ti nyadika Chairman GPS laban pekara tu nyadi ari ulah sekeda tuai PDP ti udah nendurka kaul entara PN enggau GPS,” tandu Alexander.

Suara Sarawak