KUCHING: Akademi Serakup Dayak Iban Sarawak (Asadia) sekali agi deka ngatur Kelas Leka Main Asal Iban Renggat Kedua nengah chara atas angin tauka Online kena bulan November 2022.

Kenu ku Tuai Asadia, Mabong Unggang kelas renggat kedua tu dibuka berindik ari pemujur tauka pemanah sukung ngagai Kelas Leka Main Asal Iban keterubah suba.

“Kelas Leka Main Iban tu ila deka diajar Nichol Ragai Lang iya nya siku orang ke ngembuan mayuh peneleba sereta pengelandik ba leka main jaku Iban.

MAYUH PENELEBA…NICHOL RAGAI LANG

“Nyadi Nichol deka ngajar ngena chara Google Meet tauka ‘Betemu ba Google’,” ku iya madah ngagai Ruai, Suara Sarawak, kemari.

Nangkan ke nya, Mabong madah kelas tu dibuka ngagai bala mayuh ti deka belajar ke leka main sereta jaku Iban ti dalam dalam.

Taja pia, penyampau bala ulih diterima enggau kelas nya ditatak naka 30 iku aja.

“Komiti pengatur Kelas Main Asal Iban nya semina deka meri kod masuk kelas Google Meet ngagai raban ke udah rejister aja.

“Kelas tu mega deka diatur ninting malam Hari Empat, berengkah pukul 8 malam nyentuk pukul 10 malam.

“Sekeda ari leka main ti deka diajar maya kelas tu ila iya nya Renong, Ai Ansah, enggau jaku Melah Pinang,” ku iya.

Berebak enggau nya, Mabong madah sida ti masuk kelas nya ila bepeluang belajarka siti agi leka main asal Iban ke dikumbai Beganu ti deka diajar Pengajar Lin Asit.

Nya alai, barang sapa ti deka enggau kelas tauka nemu enggau silik agi senentang Kelas Leka Main Asal Iban tu ulih berandau terus enggau Mabong Unggang ba lumur telefon 0126925562.

Suara Sarawak