KUCHING: Pengerami Regatta Sarawak ngerikod pemujur lebuh semak RM200,000 asil pengelandik jari mujur dijual taja baru berengkah kemari.

Premier Sarawak Datuk Patinggi Tan Sri Abang Johari Tun Openg madahka pengerami nya mujur ngerembaika dagang peranak di menua tu.

RICHAH… Abang Johari meri sukung ngagai bala penyereta lumba bot naga ba Kuching Waterfront ditu pagi tadi.

“Aku meri pengaga ati ngagai Opis Menteri Dagang Temuai, Industri Kreatif Enggau Seni Pemerindang enggau Residen Kuching ti ngatur Regatta Sarawak pengudah dua taun kitai napi pendemik Covid-19.

“Sida madah ngagai aku, timbal ari mensia mayuh chukup manah kelebih agi ari sukut bala pemekit entarabansa ba lumba bot naga,” ku iya.

Abang Johari bejaku munyi nya lebuh ditanya pemberita pengudah Bejadika Regatta Sarawak, Festival Tebing Sungai Kuching 2022 di Waterfront Kuching ditu pagi tadi.

Suara Sarawak