MIRI: Mensia mayuh ke bisi ngembuan saman polis deka diberi kurang nyentuk 50 peratus dalam timpuh tiga hari berengkah ari 8 nyentuk 10 Oktober tu.

Tuai Polis Pelilih Miri, ACP Alexson Naga Chabu madah, pekara nya digaga beserimbai enggau Pengerami Hari Pengada Tuai Pemegai Menua (TYT) Sarawak ke-86 taun.

“Sida ulih datai ngagai Program Muka Kaunter Diskaun Saman ba Balai Polis Trafik Miri berengkah ari pukul 9 pagi nyentuk 4 lemai dalam kandang tiga hari nya.

“Taja pia, diskaun nya enda nyengkaum sekeda saman bukai ke udah ditentuka Opis Pemansik enggau Penerit Adat Trafik Kontijen Sarawak,” ku iya.

Sekeda saman ke enda disengkaum dalam diskaun nya baka saman lampu mirah, saman belantak, saman nguna lurung rabat enggau saman ngubah ekzos.

Pia mega, saman ngelih ba garis begembar, saman ngelih ke ulih nyeruga pengelikun mensia mayuh, saman randau kort (betanda -M), saman bekaul enggau lori sereta saman nadai kompaun.

Ku iya, sida ke ngembuan tugung saman ke ukai ba saman ke udah ditentuka nya deka bulih diskaun nyentuk ngagai 50 peratus.

Alexson mega ngelalau mensia mayuh ke deka ngaga bayar saman nya sida diperansang ngechek dulu saman sida ba Balai Polis Trafik ke semak bekaul enggau saman ke udah diberi diskaun nya ngambika proses bebayar saman maya nya ila bejalai lanchar.

“Sida mega diperansang nitihka atur ti udah ditentuka sereta nyaga takah diri lebuh bebaris mayar saman nya ila,” ku tandu iya.

Suara Sarawak