KUCHING: Dua kaban Batalion 8 Pasukan Gerakan Am (PGA8) bebadi nyawa ba penusah aksiden ti nyadi ba Jalai Rantau Panjang-Pasir Mas di Kelantan din, tumu pagi tadi.

Tuai Polis Pelilih Pasir Mas, Asisten Komisioner Mohd Nasaruddin M Nasir madah, seduai ti bebadi nya peranak asal Sarawak ba penusah ti nyadi urung pukul 4.25 pagi.

Ku iya, kerita Perodua Myvi ti ditepan seduai nya dipelaba ngelantak belakang sebuah lori ti paking ba tisi jalai.

“Niang Jerry Layong Nyalin, 32, enggau niang Juna Jembat, 39, bebadi tekala nya ba endur penusah nyadi pengudah balat bakal ba pala.

“Seduai lalu dianjung ngagai Unit Forensik Sepital Pasir Mas (HPM) ungkup pansik bukai.

“Ari ripot, penusah nyadi ba jalai lurus enggau enda sekut tang jalai basah laban bisi ujan kelimpah nadai orang ti meda lebuh nya,” ku iya ba sebengkah penerang berita, tadi.

Mohd Nasaruddin madah, orang ti sebilik enggau seduai nya udah dipadah lalu raban pengatur pengawa opis PGA8 benung ngatur pengawa ti patut.

Berindik ari nya, iya ngelalau orang ti deriba bejimat lebuh betengahka jalai alun dikena nyeliah sebarang penusah nyadi.

Suara Sarawak