SIBU: Adun Tamin, Ir Christopher Gira Sambang udah nyikap diri ngerebut penuduk Parlimen Selangau enti dipilih nyadi chalun Gempung Parti Sarawak (GPS) ba Pengawa Bepilih Besai Ke-15 (PRU-15) tu.

Iya nerangka pekara nya lebuh dirandau nengah telefon nimbal penerang dibantai Tuai Rumah Rickie Andrewson Ngalai ari Skuau sereta rayat renggat baruh ti minta iya nyadi chalun GPS maya bepilih besai tu.

“Ukai pekara muntang deka ngerebut penudukt tu tang ari peminta enggau pengandal, dia aku nyikap diri nurun ke kelang enti diberi tuai GPS peluang.

Ir Chritopher Gira Sambang

“Tang tu bepanggai ba pemutus tuai parti. Enti sida pechayaka aku ulih ngerampas baru penuduk Selangau ari penyakal, aku sedia bejalaika tanggungpengawa tu,” ku iya.

Gira ti mega Sapit Tuai Pemadah Parti Rakyat Sarawak (PRS) ngelalau pengundi ba Parlimen Selangau nyengkaum ba Dun Tamin enggau Kakus deka meri sukung penuh ngagai chalun GPS ti bepadan dia ila.

Iya madah, sekumbang sitak nya dipegai penyakal berengkah ari taun 2018 suba, Selangau napi mayuh pengerugi laban nadai diungkupka belanja.

“Tu mih maya kitai ngerampas baru penuduk Selangau ngambi agih belanja pemansang ulih diberi laban diatu agih belanja semina bepanggai ba Dun Tamin enggau Kakus aja,” ku iya.

Suara Sarawak