SIBU: Komiti Penyangga Penusah Negeri Sarawak (JPBNS) udah berengkah nyendiaka perengka guna kena napi penyadi ribut enggau ujan bangat ke dibai monson Timur Laut ba menua tu.

Sapit Menteri Pengerai Mensia Mayuh, Pengawa Berumah enggau Kaunsil Kandang Menua, Michael Tiang Ming Tee madah, pekara nya diadang nyadi berengkah ari bulan Disember taun tu nyentuk bulan Januari taun dudi.

Enggau nya, ku iya, sekeda kandang endur ke baruh ba Sarawak ditu diadang deka napi penusah ampuh bah.

Iya mansutka pekara nya lebuh nemuai ngabas pengawa meresika sistem parit ba Jalai Seladah ditu empai lama ke udah.

“Pengawa meresika parit ba Jalai Seladah nya sebengkah inisiatif tumu kena nagang sereta napi ubah gaya hari ti bepun ari penyadi monson Timur Laut.

“Inisiatif nya diatur ngambika pengawa ninting hari peranak dia enda tejanggal,” ku Tiang ke mega Adun Pelawan.

MATAU PARAS SUNGAI…Tiang pematau pengawa meresika parit ba Jalai Seladah.

Ku iya, pengawa meresika parit nya sebengkah chara dikena mutarka penanggul penganyut ai parit ti lubah ketegal parit nya nyau sumbat sereta ngujungka penanggul ampuh bah nyadi.

Tiang madah, ba maya ke sebaka, inisiatif nya ulih nyeliahka kandang endur nya ari dituntung penusah ampuh bah laban penganyut ai parit dia udah lanchar sepengudah dikemeresika.

“Lebuh diperatika silik, sistem parit ba endur tu enda tentu manah ti ngujungka peranak dia napi penanggul bepun ari pekara nya.

“Tanah ke anyut dibai ai ujan lalu betugung dalam parit ti ngujungka parit nya nyau pabu sereta tumbuh rumput lalu ditambahka pemayuh bansa uras ke dibuai orang ke enda beradat dalam parit nya.

“Nya ukai semina ulih ngasuh penusah ampuh bah nyadi tang ba maya ke sebaka ulih nyeruga pengerai enggau nachatka pemanah rampa menua dia,” ku iya.

Tiang mega beterima kasih ngagai peranak dia laban mujur meri kerejasama ti manah sekumbang pengawa meresika parit nya dipejalaika.

Suara Sarawak