MIRI: Tuai komuniti enggau Tuai Raban Bansa (KMKK) dilalau ngambi meri servis pemadu manah ngagai komuniti nadai ngira maya enggau endur pengudah sida nerima surat dichiri nya.

Menteri Perengka Pengangkut Sarawak, Datuk Sri Lee Kim Shin nerima dua ripot madahka sekeda bala KMKK enggai kiruh nyaut telefon ari mensia mayuh.

“Aku bisi nerima ripot ti madahka KMKK enggau kiruh nyaut tauka betemu enggau komuniti kelebih agi maya ujung minggu.

SEDIA GAWA…Kim Shin begambar ungkup kenang begulai enggau KMKK ti baru dichiri sereta dichiri baru.

“Enti sida beguna chop, raban KMKK patut nyendiaka chop nya ba rumah lalu nadai kebuah sida ngiga kedalih enda gawa maya Hari Minggu,” ku iya madah nyemetak.

Adun Senadin mansutka jaku nya lebuh nyuaka Surat Dichiri KMKK Miri N75 Senadin ba Kompleks Islam Miri, kemari.

Ku iya, tanggungpengawa KMKK ukai semina ngenukuka dokumen aja tang ngembuan mayuh tanggungpengawa bukai.

“Sida mih orang ti semak enggau komuniti ba baruh pegai sida lalu semua penanggul rayat ba genturung pendiau patut dikenatai ngagai perintah ngambi diputar lengkas.

“Bala KMKK patut muntang dikangau ngena telefon sereta dilawa komuniti ti begunaka sida ba mayuh bengkah pekara.

“Ambika chunto, enti sida nerima ripot bekaul enggau lampu jalai jai tauka jalai belubang, sida patut ngenataika pekara nya ngagai ejensi perintah bekaul nentuka penanggul nya diputar,” ku iya.

Suara Sarawak