KUCHING: Ari Januari nyentuk September 2022, Opis Pengintu Pengelantang Mensia Mayuh Sarawak (JKMS) udah meri bantu belanja penyampau RM184,418,170 ngagai 52,751 iku penerima ba serata Sarawak.

Menteri Pemansang Orang Indu, Anak Mit Enggau Pengelantang Raban Bansa Datuk Seri Hajah Fatimah Abdullah madahka agih belanja tu dibagi ngagai lapan bengkah skim bantu ti ditetapka JKMS.

NERANG… Fatimah (tengah) bejaku rambau aum media pengudah nerima penemuai basa ari Tuai Direktor Opis Pengintu Pengelantang Mensia Mayuh Datuk Shaharuddin Abu Sohot (kiba) di Begunan Baitulmakmur ll ditu tadi.

“Entara skim tu iya nya Bantu Orang Tuai (BWE) penyampau RM500 ngagai 19,809 iku penerima ke alai bantu tu nguna agih belanja penyampau RM86,931,000.

“Kelimpah ari nya, Bantu Nembiak Mit (BKK) penyampau RM150 nyentuk RM1,000 ngagai 7,773 iku penerima ngena agih belanja RM22,531,900,” ku iya.

Fatimah bejaku munyi nya rambau aum media pengudah nerima penemuai basa ari Tuai Direktor Opis Pengintu Pengelantang Mensia Mayuh Datuk Shaharuddin Abu Sohot di Begunan Baitulmakmur ll ditu tadi.

Suara Sarawak