LUBOK ANTU: Siku nembiak sekula ditu begunaka bantu belanja dikena nampung pelajar ba sebuah palan pelajar tinggi perintah menua tu.

Marylyne Chong madahka adi iya, Margaret Linsa anak Mckanzie ari Rumah Numpang, Nanga Sempang dipilih nampung pelajar ba Universiti Malaysia Sabah (UMS) lalu diasuh rejister kena 10 Oktober tu.

Ku iya, nya endang siti berita manah ngagai sida sebilik tang sida betapi enggau penanggul ari sukut belanja kena nyengulaka adi iya nya.

TEMEGAH ATI…Marylyne (kiba) begambar kenang enggau adi iya, Margaret Linsa (kanan) ti mujur dipilih nampung pelajar ngagai UMS.

“Adi aku udah dipinta mayar RM2,235 ngagai UMS sebedau 10 Oktober tu.

“Kami tiga iku diri menyadi lalu aku anak tuai sereta bisi dua iku anak ti dipelanja aku empu lalu siku agi diibun ex-entua aku. Kami sebilik endang bepanggai ba aku magang.

“Indai kami udah nadai ba penusah aksiden ke nyadi bulan April tu tadi lalu apai aku balat bakal ngujungka iya enda ulih gawa agi lalu siku anak aku patah kaki ba penusah nya suba.

“Ukai naka nya aja, aku mega melanja siku adi indai aku ke nyelai pendiau (OKU) ti diau nyemilik kami,” ku Marylyne sinu.

Iya madahka diri bekuli ba sebuah di Kuching kena ngiga belanja ke sida sebilik tang gaji tudah enda chukup kena nampung belanja sekula adi iya nya.

Nya alai, iya minta saup mensia mayuh ngelempungka tating belanja sida sebilik kelebih agi belanja dikena adi iya besekula ba UMS ila.

“Mensia mayuh ti deka nemu enggau silik bekaul enggau pekara nya tau betanya ngagai aku nengah lumur telefon 013-3261150,” ku iya.

Suara Sarawak