KUCHING: Sarawak deka meri fokus latih bepenau tinggi ngagai bala nembiak ti belajar dalam industri pengawa berumah kelebih agi nangkup guna kereban teknologi awakka bala nembiak tu bepeluang bulih pengawa ti setipak enggau peminta industri.

Sapit Menteri Pemansang Mengeri Enggau Pengeraja Asal Datuk Len Talif Salleh madahka Perintah Nengeri udah ngatur mayuh program pemansang ti deka meri peluang besai ngagai nembiak.

“Kitai bisi lapan bengkah ejensi ti ditumbuhka Perintah Nengeri ungkup nangkup sekeda peminta pemansang baka Kaunsil Pemansang Koridor Wilayah (Recoda), Ejensi Pemansang Ulu Rajang (URDA), Ejensi Pemansang Tanah Tinggi (HDA), Ejensi Pemansang Wilayah Utara (NRDA), Ejensi Pemansang Bersepadu Wilayah Samarahan (IRSDA), Ejensi Pemansang Sri Aman (Sada), Ejensi Pemansang Betong (BDA), Ejensi Pemansang Greater Kuching (GKDA) enggau Ejensi Pemansang Rajang Delta (RDDA).

“Genap ejensi tu dibekalka enggau bajet RM1.5 bilion ke alai 60 ke 70 peratus bajet nya ungkup pengawa infrastruktur,” ku iya.

Len Talif bejaku munyi nya rambau aum pemberita ba Program Konvokesyen Akademi Kaunsil Pemansang Industri Berumah (CIDB) di Palan Aum CIDB Sarawak ditu kemari.

Ku iya, nya mai reti Sarawak begunaka mayuh pengereja pengawa teknikal bepenau.

MANAH…Pelin rumah 3D entara chunto pelin rumah ke dikemansang ngena teknologi baru nyadika chuan dipelajar ba CIDB Sarawak. –Gambar Mohd Alif Noni

“Tu mega mandangka Sarawak ngembuan mayuh peluang pengawa puang, menua kitai patut ulih nyapai 100 peratus pengawa puang tu.

“Nya alai perintah nyendiaka peluang latih baka tu awakka semua ejensi ti ditumbuhka tu ulih meri pemaik nengah peluang pengawa puang ngagai anak Sarawak.

“Nya ulih mantu sida nangkup peluang gawa ba menua tu sereta nemu nguna kereban teknologi baru,” ku iya.

Nangkan nya, Tuai Eksekutif Kaunsil Pemansang Industri Pengawa Berumah Malaysia Datuk Ir Ahmad Asri Abdul Hamid madahka latih ti dipejalaika ba CIDB endang meri fokus ngagai guna kereban teknologi baru enggau transformasyen industri berumah.

“Industri pengawa berumah napi mayuh isu baka produktiviti, tikas pengelikun, kualiti enggau kelalu bepanggai ngagai penau pengereja pengawa luar.

“Nya alai, diatu kami ngatur latih transformasyen nguna chara baru bepelasarkan teknologi baka IBS enggau ‘Printing 3D’ dikena narit minat pengereja pengawa menua kitai empu,” ku iya.

BEJADI…Talif (tengah) nguntin riben kelai bejadika pelin rumah 3D nyerumba Program Konvokesyen Akademi Kaunsil Pemansang Industri Berumah (CIDB) di Palan Aum CIDB Sarawak ditu kemari.-Gambar MOHD ALIF NONI

Iya madahka, pemansang teknologi tu enda deka ngeruga raban pelatih ti pansut ari palan pematih laban semua kereban teknologi tu agi begunaka bala pengereja pengawa ti ngembuan penau nya.

“Diatu kami enda deka ngelatih pelatih nusun batu bata enggau pengawa ti mar baka suba laban nembiak jeman diatu enggai ngereja pengawa baka nya agi, sida deka agi ngadu pengawa nguna mesin, bisi irkon enggau begaji besai.

“Rambau Atur Mindah Betagang (PKP) kami bisi ngaga pansik, pengereja pengawa menua luar pemadu mimit iya nya ba Sarawak (30-40 peratus aja) enti dibanding enggau nengeri bukai baka Kelantan enggau Terengganu iya nya 50 peratus, seraya di Kuala Lumpur enggau Selangor iya nya 85 ke 90 peratus.

“Tu ngelaika, nyema Sarawak bejalaika mayuh projek pemansang, peluang pengawa puang di menua tu deka meri pemaik ngagai anak Sarawak empu,” ku iya.

Suara Sarawak