ADAT…Peter John (duduk, dua kiba) begulai enggau bala bukai ngepunka pengawa ngaga pantang nya enggau adat Miring.

KUCHING: Festival Tatu Kuching diatur di Kuching ungkup keterubah berengkah ari 30 September nyentuk 2 Oktober tu.

Tuju pengerami tu dikena ngetan main asal enggau ngidupka budaya komuniti di Borneo.

Panglima Penyerakup Sabah Sarawak Peter John Jaban madah, pantang nya endang siti adat tauka identiti rayat di Sarawak.

“Nyema orang luar meda ari bansa pantang, sida ulih ngelala nya orang Borneo.

“Ukai naka nya dikena ngerembaika penau seni dalam diri artis-artis biak, pengerami tu mega ulih dikena ngiri penemu baru ngagai orang bukai ngambika terus ngelala adat pupu bansa ditu,” ku iya.

Kelimpah ari nya, pengerami pantang tu mega dikena ngidupka ukir asal orang Dayak ke nyau majak punas ba taun 1970-an tauka 1980-an.

“Ukir pantang tu diidupka baru ngambi rebak baru ulih ngetanka ukir asal orang Dayak baka Bungai Terung.

“Enti suba, orang kita malu mantaika pantang ba tubuh, tang diatu selampur dunya nemu pasal motif pantang ke tubuh,” ku Peter maya dirandau media ba pengerami nya kemari.

Beduduk ari nya, pengari mendam Dayak Duta entarabangsa ngagai Gerempung Penyerakup Bansa (PBB) Andrew Ambrose @ Atama madha, pengerami nya endang patut diatur laban ekonomi budaya ungkup orang asal kelalu mit ba mata dunya.

“Pengerami tu endang siti pengawa badas ukai semina ungkup komuniti enggau mega bala artis pantang, laban semua artis pantang endang pengereja pengawa seni.

“Ari pengerami tu kitai ulih meda enggau mansik pengasi pantang nya ungkup adat kitai, taja pia baka ni chara kitai ngetanka pantang tu ungkup dipeda orang luar,” ku iya.

Suara Sarawak