MIRI: Pedagang mit enggau jelan pemesai mesti lebih kreatif enggau inovatif nentuka dagang sida lebih maju enggau ulih besemekit ba makit dunya.

Sapit Menteri Dagang Temuai, Industri Kreatif enggau Seni Pemerindang, Datuk Sebastian Ting madah, Opis Menteri Dagang Entarabansa enggau Pengawa Beranakka Puku (Mintred) udah ngatur bemacham kus ungkup raban nya.

“Mintred udah nyendiaka agih belanja ungkup bumiputera sereta kus nentuka raban tu ngerembaika dagang sida,” ku iya.

BERI KE NUAN… Kaunsilor Aries nerima tepa Tanjak ari siku penyereta Kus Strategi Dagang seraya dikemata bala bukai.

Teks jaku Adun Piasau nya dibacha Kaunsilor Aries Leong ba pengawa bejadika Kus Strategi Dagang di Balai Serakup Pedagang Bumiputera Miri Sarawak (PBMS).

Ku iya, juluk ngangkatka menua Miri nyadi mengeri udah dijapai lalu tu bepanggai ngagai pedagang ngeranchakka pemansang ekonomi.

“Mengeri Miri mega ulih matak orang luar lebih agi temuai nemuai ngagai palan ngelantangka ati.

“Pekara tu nentuka ulih nambahka asil bedagang enggau transaksyen dagang,” ku iya.

Suara Sarawak