KUCHING: Pengawa nyukat tanah genturung pendiau asal sigi enda diketu seagi bedau tembu, taja Perintah Sarawak patut mayar ungkus ke mayuh.

Premier Sarawak Datuk Patinggi Tan Sri Abang Johari Tun Openg madah, nya dikena nentuka genap genturung pendiau ba Sarawak bulih surat pala tanah dibaruh Seksyen 18 Kanun Tanah Negeri (KTN).

“Mayuh genturung pendiau asal udah disukat tang bedau chukup.

“Kitai sigi enda ngetu, kitai agi deka nyukat,” ku iya maya Bejadika Diwan Komuniti Kampung Haji Baki enggau Nyerahka Surat Pala Tanah Seksyen 18 Kanun Tanah Nengeri ungkup Kampung Semeba enggau Kampung Tematu di Dewan Komuniti Kampung Haji Baki, ditu kemari.

Abang Johari madah beduduk ari pengawa nya, iya udah ngemendarka pengawa nambahka 400 staf Opis Tanah enggau Survei (JTS) ungkup bejalaika pengawa nyukat kelingi tanah ba nengeri tu.

BERANDAU…Datuk Patinggi Tan Sri Abang Johari Tun Openg (kiba) berandau enggau bala tuai raban bansa ti ngelaluka penatai iya ngulu pengawa Bejadika Diwan Komuniti Kampung Haji Baki enggau Nyerahka Surat Pala Tanah Seksyen 18 Kanun Tanah Nengeri ungkup Kampung Semeba enggau Kampung Tematu di Dewan Komuniti Kampung Haji Baki, ditu kemari.-Gambar MOHD ALIF NONI

“JTS suntuk staf, nyadi aku nambahka penyampau staf reti nya agih belanja dikena mayar gaji enggau pengawa tu endang ungkup rayat,” ku iya seraya madah deka meli kerenban penuh ungkup JTS bejalaika pengawa nyukat tanah.

Iya mega madah nengah Seksyen 18 KTN, tanah genturung pendiau asal nadai diletak bayar premium.

“Reti nya tanah pechuma lalu enti disukat dibaruh seksyen bukai, taja patut mayar premium tang patut dikurang.

“Ambika banding siti lot iya nya RM2,500 taja pan rega tanah nyangka lebih RM20,000…ke bukai nya diserap enggau ditanggung perintah Gempung Parti Sarawak (GPS),” ku iya.

Kenu ku Abang Johari, dalam timpuh ari 2010 nyentuk Ogos taun tu aja, JTS udah mujur nyukat kelingi urung 2.5 juta ikar di selampur Sarawak.

Sama datai Sapit Premier Datuk Seri Dr Sim Kui Hian, Adun Batu Kitang Lo Khere Chiang, Senator Datuk Ahmad Ibrahim, Adun Kota Sentosa Wilfred Yap enggau Direktor JTS Datu Abdullah Julaihi.

Suara Sarawak