TOKYO: Juluk besai Sarawak deka nyadi hab hidrogen di rantau Asia begunaka pemutus enggau atur ke engkeman, ku Premier Sarawak Datuk Patinggi Tan Sri Abang Johari Tun Openg.

Kenu ku iya, Sarawak udah berandau enggau pedagang besai ari Jipun enggau Korea sereta ransing deka bekerejasama enggau nengeri tu ngasilka hidrogen dikena negapka industri di dua bengkah menua nya.

“Nengah pengering enggau kuasa ke ulih dikemaru, Sarawak udah sedia nyadi pengeluar pengeluar hidrogen gadung besai ba rantau tu manggai taun 2028,” ku iya.

NERANG…Abang Johari benung bejaku ba Forum Hidrogen Tokyo diatur Perintah Metropolitan Tokyo, Jipun, kemari.

Iya madah munyi nya maya meri timbal rambau nyadi pengelicha panel nyaut tanya pematak randau ba Forum Hidrogen Tokyo diatur Perintah Metropolitan Tokyo, kemari.

Nerang silik, ku iya dikena nagang penusah ketegal pangka ubah gaya hari dunya ke nadai menuku jam diatu, nya beguna amat ke saup komuniti dunya.

“Endang udah nyadi tanggungpengawa dunya ngurangka ubah gaya hari. Komuniti di selampur dunya mesti besaup napi penanggul tu,” ku iya.

Kenu ku iya, dikena ngemujurka tanggungpengawa nya, Perintah Sarawak udah ngeletak polisi ke seriris enggau tusun pengawa ubah gaya hari dunya ke digaga betuju ngurangka karbon.

“Nya alai, udah datai maya iya Sarawak begulai enggau selampur dunya ngaga pengawa ngalih ngagai kuasa dikena nyapai tikas angin ke beresi manggai taun
2050 baka ke udah ditetapka tusun pengawa Paris.

“Nengah SEDC Energy, kitai benung berunding enggau Sumitomo Corporation sereta Eneos Corporation of Japan dibaruh Projek Hornbill nyelinting hidrogen gadung nengah methylcyclohexane (MCH) ke benung ba arus pejalai nuju juluk 2028.

“Sarawak mega benung berunding enggau Samsung, Posco enggau Lotte of Korea dibaruh Projek Bunga Raya dikena meli baru nengah ammonia,” ku iya.

Bekunsi peneleba Sarawak dalam kuasa hidrogen, iya madah nya berengkah enggau pengawa mansutka hidrogen pemungkal taun 2016 dibaruh Sarawak Energy ti nyendiaka gas ungkup guna bas enggau kerita hidrogen di Kuching.

Dulu ari nya, Abang Johari enggau raban deligit iya ngatur pejalai ngelawa Stesyen Hidrogen Tokyo Oi enggau Muzium Hidrogen Tokyo, ditangkan penemuai basa ngagai Gabenor Tokyo Yuriko Koike ba opis iya.

Sama nyempulang pejalai Premier Sarawak iya nya sapit iya, Datuk Amar Awang Tengah Ali Hassan; Sekretari Perintah Nengeri Datuk Amar Mohamad Abu Bakar Marzuki; Sapit Sekretari Perintah Nengeri Datuk Dr. Muhammad Abdullah Zaidel;  Chairman SEDC Tan Sri Datuk Amar Abdul  Aziz Husain enggau Tuai Sekretari Politik ngagai Premier Sarawak Fazzrudin Abdul Rahman.

Suara Sarawak