KUCHING: Sibu deka nyadi palan keterubah ba menua Asia nyadi tuai rumah endur ngatur Participatory Design Conference (PDC) ba taun 2024 ila.

Aum nya keterubah iya diatur ba Malaysia ketegal penyulut Sarawak ngalahka menua pemun ke bukai ba selampur dunya.

Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah madah, aum ke diatur Universiti Teknologi Sarawak (UTS) ba Sibu nya deka diatur ba pengelama 10 hari.

Ku Abdul Karim, pekara nya chukup nyelai laban nya keterubah iya aum dagang besai baka nya diatur ba luar Kuching enggau Miri.

“Aum nya ila deka dipasuk lebih ari 500 iku bala penyereta ari 50 buah menua ari selampur dunya.

PROGRAM BESAI…Abdul Karim (tengah) begulai enggau bala bukai mandangka poster PDC 2024.-Gambar HAKEM

“Nya chukup manah laban ulih mantu ngelakuka Sarawak ngagai mata dunya kelebih agi ba Pelilih Sibu ba program dagang nya,” ku iya.

Iya ke mega Menteri Nembiak, Lumba enggau Pemansang Usahawan mansutka pekara nya ba aum media PDC 2024 ba Begunan Baitulmakmur II ditu kemari.

“Aum ke bepelasarka rambai jaku ‘Menjangkau; Menghubungkan Melangkaui penyertaan’ deka belematika baru inisiatif, pemansik sereta ubah dalam bidang Teknologi Pemadah enggau Arus Penyambung (ICT) dalam kandang tiga puluh taun ke udah.

“Pia mega, aum nya deka berandauka chara mutarka penanggul reka bentuk produk, servis enggau sistem rama teknikal sereta merening ngagai struktur, tanggungpengawa enggau hak dalam sistem tibekaul enggau tanggungpengawa mensia enggau teknologi.

“Sekeda chunto sistem rama teknikal ti tebilang ti bekaul enggau mensia enggau teknologi baka e-mail, blog enggau media rama,” ku iya.

Ku iya mega, PDC 2024 nya kena ngerembaika kaul komunikasyen entara raban orang pintar, orang negika hak, komuniti pemansik enggau orang beguna ari dalam enggau luar menua.

“PDC 2024 tu chukup beguna ngagai Sarawak kena ngemujurka Atur Pemansang Pengudah Covid-19 2030 iya nya nyadi menua mansang ba ekonomi, sosial enggau pemanah rampa menua, ku iya.

Mandal Chanselor UTS, Datuk Dr Khairuddin Abdul Hamid madah, raban sida chukup temegah ati nyadi tuai rumah laban ngembuan penau ti engkeman bekaul enggau pekara ti deka diaumka maya nya ila.

“Aum nya ke bendar deka diatur dalam pengelama lima hari tang sebedau nya deka diatur kus, program begulai enggau komuniti menua tu baka nemuai ngagai sekeda rumah panjai, inovasyen produk menua tu ngena teknologi enggau mayuh agi ke bukai.

“Pekara tu deka ngengkahka Sarawak dalam kar palan dagang enggau dagang temuai dunya ti ngerinduka ati ari sukut penemu, inovasyen sereta pengawa bekunsi ke manah,” ku iya seraya madahka aum nya ila deka diatur ba UTS dia empu.

Sama ngulu program nya Sekretari Mendap Opis Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah, Chairman Kaunsil Kandang Menua Sibu, Clarence Ting enggau Tuai Pegawai Eksekutif BESarawak, Amelia Roziman.

Suara Sarawak