KUCHING: Perintah Sarawak deka meri Skim Bantu Deposit RM10,000 mungkur jali nengah ejensi bank komersial.

Premier Sarawak Datuk Patinggi Tan Sri Abang Johari Tun Openg madahka sebedau tu Bantu Deposit RM10,000 diberi perintah ungkup sida ti ngulihka jali nengah ‘Mortgage and Finance’.

“Diatu bisi peminta ari sida ti meli rumah nengah jali bank komersial, sida nanya baikka sida ulih bulih bantu deposit RM10,000 nya.

“Sapit Premier Dr Sim (ti mega Menteri Pengerai Mensia Mayuh, Pengawa Berumah Enggau Kaunsil Kandang Menua Datuk Seri Dr. Sim Kui Hian) nanya aku, baikka kitai ulih meri bantu ngagai sida tu, aku madahka nyema sida udah bulih jali ari bank komersial, sida ulih nerima bantu ari RM10,000 nya,” ku iya.

Abang Johari bejaku munyi nya rambau Bejadika Ekspo Hartanah SHEDA 2022 di Palan Aum Borneo Kuching ditu kemari.

Ku iya, bantu tu deka diatur dikena mantu bayar bulan orang ti ngaga jali ngagai bank komersial sepemgelama 48 bulan.

“Reti iya, nyema sida deka mayar jali RM400 sebulan, ari RM10,000 nya, perintah meri bantu RM200 sebulan, RM200 agi dibayar sida empu.

“Sepengelama 48 bulan kitai meri RM200 bantu nya enda ibuh dibayar agi, Gempung Parti Sarawak (GPS) meri pechuma,” ku iya.

Pekara nya, ku iya meri pemaik ngagai rayat, pemaju pengawa berumah enggau ejensi bank komersial.

Sama bisi datai, Kui Hian, Presiden SHEDA Augustine C.H. Wong, enggau bala bukai.

Suara Sarawak