BINTULU: Skim Jali Ngaga Rumah Panjai (SPPRP) nya sebengkah inisiatif Perintah Sarawak dikena meri peluang ngagai peranak rumah panjai ba menua tu minta jali nya dikena ngentak rumah panjai baru sida.

Sekretari Politik ngagai Premier Sarawak, Edwin Banta madah, skim nya dikena nyaut peminta peranak rumah panjai ti suah betanya pasal pekara nya sebedau tu.

“Skim tu ulih meri pengelantang ngagai peranak rumah panjai laban ari nya sida ulih ngaga rumah panjai baru.

Edwin nyuaka surat minta SPPRP ngagai sekeda peranak rumah panjai nya.

“Terima kasih ngagai Kaunsil Pemansang Pengawa Berumah (HDC) laban udah nyendiaka SPPRP tu sereta meri bayar pulai enggau penyampau ke baruh,” ku iya.

Iya mansutka pekara nya ba Program Nyuaka Surat Minta Skim SPPRP ngagai 51 pintu ba tiga buah rumah panjai nyengkaum Rumah Das, Stapang, Rumah Narang, Oya enggau Rumah Penshie, Siong ba pelilih Selangau kemari.

“Nengah skim nya ke nyampau RM1,530,000, genap pintu deka nerima jali sepenyampau RM30,000 siku lalu sida semina dipinta mayar RM100 sebulan dalam timpuh 25 taun.

“Skim tu sebengkah chara dikena Perintah Sarawak ngelempungka tating belanja bala peranak rumah panjai kena sida ngaga rumah panjai baru sida,” ku Edwin.

Suara Sarawak