BEJADI… Premier Datuk Patinggi Tan Sri Abang Johari Tun Openg begulai enggau Prof. Datuk Sri Dr. Sim Kui Hian (tiga ari kanan)sereta bala bukai maya bejadika Sheda Property Expo di BCCK, Kuching kemari. – Gambar GHAZALI BUJANG

KUCHING: Perintah Sarawak udah numbuhka Strata Tribunal Sarawak dikena mutarka penanggul ti ayan entara pemeli rumah enggau pemaju pengawa berumah ba Sarawak.

Premier Sarawak Datuk Patinggi Tan Sri Abang Johari Tun Openg madahka perintah mesti ngatur pekara strata tu engka bisi penanggul ayan entara pemeli rumah enggau pemaju pengawa berumah ba maya ti deka datai.

“Nya alai, perintah setuju numbuhka strata tribunal ti dikumbai Strata Tribunal Sarawak awakka ulih ngangkatka industri pengawa berumah ditu bejalai enggau lanchar.

“Pengawa tu deka lebih meruan laban diatu, kita (raban pemeli rumah) deka bisi palan ti meruan endur mutarka sebarang penanggul, kelebih agi penanggul entara pemeli enggau penyual rumah,” ku iya.

Abang Johari bejaku munyi nya rambau Bejadika Ekspo Hartanah SHEDA 2022 di Palan Aum Borneo Kuching ditu kemari.

Berebak enggau nya, Abang Johari madahka entara pekara ti patut diperatika bekaul pengawa berumah di menua tu iya nya dagang temuai rumah kedua ba Sarawak.

Ku iya, polisi rumah kedua tu lebih fleksible ungkup orang luar meli reta ba menua tu.

“Polisi tu udah dibantaika Datuk Karim (Menteri Dagang Temuai, Industri Kreatif Enggau Seni Pemerindang Datuk Seri Abdul Karim Rahman Hamzah).

“Enti dipeda, dalam timpuh lapan bulan ke udah, timbal bala pemeli rumah kedua chukup manah, lebih manah ari taun ke dulu dalam timpuh ti sama,” ku iya.

Suara Sarawak