TERIMA KASIH…Chairman STU Pampang Kota Samarahan, Alva Amin (tengah) nyuaka tepa ngagai Adun Tebedu, Simon Sinang (dua kanan) sereta dikemata Presiden STU, Kullin Djayang (dua kiba) enggau bala bukai.

KUCHING: Serakup Pengajar Sarawak (STU) muji sereta meri terima kasih ke berita manah ti udah dibantaika Menteri Besai (PM) Datuk Sri Ismail Sabri Yaakob iya nya ngemendarka pengawa nikika pangkat bala Kepala Pengajar (GB) enggau Sapit Kanan Sekula Primari nyentuk ngagai DG54 sereta enda nyeruga tanggungpengawa sida.

Presiden STU, Kullin Djayang madah, pekara nya udah dikenataika semua serakup pengajar ba selampur Malaysia sereta udah dikemendarka PM enggau Opis Menteri Pelajar.

Kullin mantaika pekara nya lebuh bejaku ba Program Cakna Ilmu ke diatur STU Pampang Kota Samarahan ba Serian empai lama ke udah.

Sepenyampau 200 iku bala nembiak nyengkaum bala pengajar enggau raban STU ngambi bagi ba program nya.

Iya mega beterima kasih ngagai Kaban Kaunsil Nengeri (Adun) Tebedu, Dr Simon Sinang ketegal meri bantu agih belanja ke nyampau RM10,000 ngagai STU Pampang Kota Samarahan.

“Aku ngarapka perintah semampai ngemeratka perengkaguna pemun ba sekula menua pesisir ba Sarawak ditu.

“Pia mega, penanggul internet ba sekula menua pesisir patut diberi perati lebih laban pekara nya ulih nyeruga pemanah kualiti pengawa ngajar enggau belajar (PnP).

“Penanggul nya patut diputarka enggau lengkas sereta engkeman ngambika sekula menua pesisir ulih ngasaika pengelebih internet sebaka enggau sekula ba mengeri.

“Tu mih peluang perintah mutarka penanggul nya laban tebal agi pengawa belajar tauka pekit kemaya hari mayuh diatur nengah online lalu bala pengajar ke ngisi mayuh bengkah data mega chukup begunaka arus internet ke manah,” ku Kullin.

Sama ngulu program nya Chairman STU Pampang Kota Samarahan, Alva Amin Chu, Tukang Wang ke mega pengelicha Program Cakna Ilmu, Voon Boo Thian sereta raban Komiti STU Pampang Kota Samarahan.

Suara Sarawak