KUCHING: Kelimpah ngatur sebana, Unit Integriti enggau Ombudsman Sarawak ngerembaika tanggungpengawa nengah champur jari enggau meresa projek-projek ke dipejalaika perintah nengeri tu.

Premier Sarawak Datuk Patinggi Tan Sri Abang Johari Tun Openg madah, pekara nya lebih agi ngaul projek tejanggal tauka ‘sakit’ .

“Tang, projek ke udah tembu nya deka diperesa dikena nentuka iya tembu bepelasarka standard, bajet enggau haribulan ke udah ditaga.

Sapit Premier Sarawak Datuk Amar Douglas Uggah Embas (tengah) begulai enggau pemesai bukai ari kiba Roland Sagah, Datuk Dr Sabariah Putit, Datuk Dr Juanda Jaya, Datuk
Talib Zulpilip, Datuk John Sikie Tayai, Datuk Penguang Manggil, Datuk
Gerawat Gala enggau Adana Jed ngepaika jari ti ngundan penerang beguna lalu bejadika tapa jari chap ‘Hello Ombudsman’ nyerumba pengawa nya. -Gambar RAMIDI SUBARI

“Kebuah pia laban projek ke mujur deka nyadi kelai sukat ngagai projek bukai ke sebaka.

“Inisiatif tu beguna amat dikena nentuka langgur pengawa tauka projek perintah digaga enggauy betul sereta mujur nitihka pengeransing kitai ngagai rayat enggau meri pemaik ngagai komuniti,” ku iya.

Abang Johari madah munyi nya nengah teks jaku iya dibacha Sapit Premier Sarawak Datuk Amar Douglas Uggah Embas maya Pengerami Bejadika Hari Ombuds 2022 ditu, kemari.

Nerang silik ku iya, unit nya deka ngaga penemuai gawa ngagai taba tauka projek ungkup diperesa, pengawa nya ukai betuju ngiga pengilap tauka ngeletak ukum enggau sengaja.

“Tang pekara ke lebih beguna iya nya ngiga jalai dikena mutarka penanggul tauka isu ke ngujungka prjek tejanggal tayuka ‘sakit’.

“Pia mega, apin lama ke udah aku udah ngasuh unit tu mesti nguna kuasa diri bejalaika tanggungpengawa matau, mansik enggau mutarka pekara bekaul enggau pengawa tiris ba renggat pengatur pengawa, birokrasi enggau pita mmirah dalam sektor perintah.

“Tu beguna amat dikena nyaga opis perintah nyadi lebih manah enggau nanggam kaul entara perintah enggau rayat,” ku iya.
serah dalam sektor awam.

Beduduk ari nya, iya nesau semua opis menteri, opis sereta ejensi terus meri sukung ngagai Ombudsman Sarawak lalu ngatur mutarka sebaka enggau chara ke ngasi.

“Unit tu patut terus dipejalai dikena nentuka mayuh agi raban gawa perintah dibela enggau adil awakka ransing agi ngereja pengawa manah baka pasal akauntabiliti, runding tebuka enggau kualiti servis.

Nya alai, aku deka semua pengawa bekaul nguna manah peluang tu dikena nyikap pengasi enggau produktif dalam ngatyur pengawa enggau penuh basa.

“Patutg dipadah iya nya servis ombudsman nadai bebayar, ulih dipeda semua orang enggau meri pemaik ngagai mensia mayuh nyadika pemutus alternatif,” ku iya.

Tandu iya, Sarawak mega nyadi nengeri keterubah ba Malaysia numbuhka portfolio baru lalu nyiri menteri megai tanggungpengawa bekaul enggau integriti enggau ombudsman.

“Tu endang bukti pengeransing perintah nagang penyalah makai suah enggau nerenak ulah komuniti beintegriti tinggi, sereta nambahka pemansang sosioekonomi bepasarka tusun pengawa ke manah, akauntabiliti enggau lurus,” ku iya.

Suara Sarawak