KUCHING: Semua tuai enggau pegawai opis perintah diperansang nerang ngagai rayat bekaul enggau pengawa bejalaika program pemansang ba Sarawak ditu.

Sapit Premier Sarawak, Datuk Amar Douglas Uggah Embas madah, pekara nya bepun ari penanggul mai rayat menua tu ngambi bagi ba program pemansang.

Ku Uggah, nya meri penanggul ngagai ejensi perintah ti bejalaika projek pemansang nyengkaum Ejensi Pemansang Pelilih Betong (BDDA).

“Enti rayat enda ngambi bagi ba projek pemansang nya, langgur pemansang baka BDDA tentu deka napi penanggul,” ku iya ba Program Makmal ke-2 ‘Strategi Pembangunan BDDA’ 2030 ditu malam kemari.

Uggah ke mega Chairman BDDA madah, BDDA ngembuan juluk ati deka mai pemansang penuh ngagai pelilih menua nya kelebih agi dalam bidang ekonomi ngagai tikas penuh.

BERANDAU…Uggah benung berandau enggau Tan Sri Datuk Patinggi Alfred Jabu pengudah tembu program nya.

Ku iya, pekara nya setipak enggau juluk ati Sarawak deka nyadi menua ke ngembuan tikas penatai pemisi ke tinggi ba taun 2030 lalu rayat ditu ulih ngasaika tikas pengidup ke manah agi sebaka enggau rayat ba menua mansang ke bukai.

“Pekara tu ulih nyadi enti perintah ulih ngemansangka tanah sida, nguna pengelebih ke bisi sereta penyanggup sida nempa pemujur lalu nerima atur baru bekaul enggau teknologi baru.

“Tang bisi siti sempama madah, kitai semina ulih ngiring kuda ngagai tebing sungai tang kitai enda ulih mejal iya ngirup ai nya,” ku iya.

Bekaul enggau pengawa ngemadaska agi arus internet ba pelilih Betong, Uggah madah, iya deka berandau enggau Premier Sarawak, Datuk Patinggi Tan Sri Abang Johari Tun Openg ngambika sistem ke diguna ba Spaoh diterus sereta dikemadaska agi.

“Premier Sarawak udah ngasuh Raban Penerit Adat Multimedia Sarawak bejalaika pansik senentang pekara nya laban kaul ti manah deka meri empas ke manah ngagai kolej enggau sekula ke semak,” ku Uggah.

Bekaul enggau agih belanja RM1.5 bilion ke diberi ngagai BDDA, Uggah ke mega Adun Bukit Saban madah, semua DUN deka nerima agih belanja RM200 juta lalu DUN Lingga keterubah iya semina bulih agih belanja RM30 juta.

Iya madah, sepenyampau 10 peratus kandang endur nya dipegai ba baruh BDDA lalu laluh RM70 juta nya ungkup belanja begulai lalu palan administrasyen BDDA iya nya ba Betong.

Suara Sarawak