PAKAN: Jaku rayat Julau ti dekaka chalun tauka pengari asal ari menua nya empu nyadi buah kenang bala mayuh ba sitak nya.

Peranak asal Julau, Munor Gan madah, enti chalun tauka pengari rayat ari menua nya empu, endang patut dipilih laban iya nemu nama bagi penanggul ti nuntung peranak dia.

Ku iya, sitak Julau udah chukup lama dipegai pengari rayat ari menua luar dalam kandang 30 taun lalu diatu, patut pulai ngagai peranak asal menua tu nyadi chalun.

Munor Gan

“Chalun ti deka minta pilih diatu pan sida ari luar sitak Julau ti deka ngujika diri nyadi pengari rayat ditu.

“Chukup mih laban dalam timpuh 20 taun kami ditu dipegai orang luar, lakka kami ditu empu mih ngarika menua kami,” ku iya.

Munor madah baru, peranak dia pan bisi pemandai baka orang bukai ti patut diangkatka nyadi pengari ti bisi peneleba gawa ba opis perintah enggau sektor peribit.

Ku iya, peranak menua tu endang bisi pemandai ba pekara pelajar baka enggi chalun import ari menua luar ti deka bediri ba sitak Julau.

“Nya alai, kami di Julau ke serak tu minta peranak asal menua tu empu iya nya Elly Lawai Ngalai bediri ngarika kami ba Pengawa Bepilih Besai (PRU) Ke-15 tu.

“Laban iya udah dikelala sereta ditemu ngembuan kaul ke chukup manah begulai enggau rayat mayuh sereta chakah bejalaika tanggungpengawa,” ku Munor.

Suara Sarawak