KUCHING: Program Agritek deka datai ba baru ba TVS berengkah ari November tu.

Musin kedua program nya deka mai kitai nyerungkai enggau ngasaika pejalai bala pedagang orang bumai moden Sarawak nengah siri dokumentari dikemudika Imraan Abdol Rahim.

Pengawa ngerikod program nya ditibak ari penemu Muhammad Izzat Jailani ti dikeluarka TVS nengah Program Pitch-It ungkup Agritek Musin Kedua tu.

Agritek mai kitai sama meda pengawa bala pedagang, orang bumai enggau betupika jelu moden ti mansutka produk ngena teknologi moden ti ngasuh ekonomi Sarawak ranchak agi.

“Program tu deka mantu enggau meri empas besai ngagai pedagang industri agrikultur ba Sarawak.

“Kelimpah ari nya, iya mega dikeandal meri peransang ngagai rebak biak Sarawak ti deka ngaul diri ba pengawa agrikultur,” ku pengempu penemu asal program, Muhammad Izzat Jailani.

Nya alai, sama mih kitai meri sukung enggau meda program Agritek Musin Kedua dikeluar ninting Hari Enam urung pukul 12:30 ngalih hari berengkah 26 November 2022.

Program tu semina ba TVS, channel 122 Astro enggau MYTV siri dokumentari ti disempulang genteran jaku ngena Jaku Melayu enggau Jaku English ungkup serap komuniti.

Suara Sarawak