Datuk Ali Biju

SARATOK: Penyandang penuduk Parlimen Saratok, Datuk Ali Biju berasai lantang ati ngena lambang Perikatan Nasional (PN) ba Pengawa Bepilih Besai Ke-15 (PRU-15).

Ku iya, penerang dibantaika Presiden Bersatu Tan Sri Muhyiddin Yassin meri berita gaga ngagai bala pengundi ba sitak Saratok ti ngandalka iya ulih ngetanka penuduk nya serak tu.

“Baka udah ditemu kita, PN tu sebagi ari Perintah Besai ti ngaul kerejasama enggau Gempung Parti Sarawak (GPS) ke alai kededua parti tu negika pengawa ti sama ba perintah ke bisi diatu.

“Aku ngasaika diri chukup betuah ulih gawaka pemansang rayat enggau menua begulai enggau bala bakih bukai dalam GPS lebuh dikeandal mangku pengawa nyadi sapit menteri,” ku iya.

Ali madah, lebuh nyurutka diri ari bediri minta pilih ba penuduk Dun N.39 Krian suba, iya endang enggau ati lurus mantu chalun Parti Demokratik Progresif (PDP) bekimpin.

“Aku udah ngamatka semaya diri enggau bejalaika tanggungpengawa baka udah dipesetuju ba sempekat ti udah digaga kededua raban.

“Ketegal utai ti nyadi diatu, dia pemutus Presiden ngemendarka aku ngena lambang PN ba PRU-15 tu nadai pulaika penanggul,” ku iya madah nyemetak.

Suara Sarawak