KUCHING: Akademi Serakup Dayak Iban Sarawak terus chakah ngetanka ke ngepan Iban ngambi meruan dikena nembiak rebak baru taja pan diatu dunya majak disegang arus pemansang teknologi moden.

Ku Tuai Asadia Mabong Unggang, ngambi pengelandik ngaga ngepan asal enda lenyau, dia Asadia udah ngatur kelas ngaga marik empang tauka tangu sereta kelas ngaga kain burie.

“Dua iti ngepan nya endang sigi tebilang sereta beguna amat ba pengidup bansa Iban.

NGEPAN KITAI…Mabong Unggang (tengah) begambar ungkup kenang enggau raban ti bisi masuk kelas ngaga kain burie diatur Asadia. Bela dipeda Elizabert Tara (lima kanan) enggau Roselind Indo (lima kanan).

“Kain burie tu dikena maya bisi pengerami tauka maya Gawai ngambika manding dipeda.

“Udah nya, tangu tu siti ari ngepan dikena sida ke indu, lebih agi maya ngajat,” ku iya madah ngagai Ruai, Suara Sarawak kemari.

Nangkan nya, Mabong madah ari pengelandik ngaga tangu mega ulih dikena nusuk marik enggau ngepan bukai ti besangkut paut enggau nusuk marik.

MANAH…Pendiau tangu ke mujur digaga penyereta kelas ngaga tangu ke benung diatur Asadia bepalan ba Indu Opis Asadia Kuching di Kota Sentosa.

“Ngepan indu enda engkeman enti nadai tangu. Nya alai, pengelandik ngaga tangu nya patut dikemeran sereta dikembai ngagai rebak baru,” ku iya.

Ku Mabong, ungkup kelas ngaga kain burie orang ke udah dikangau ngemujurka kelas tu iya nya Roselind Indo enggau Elizabeth Tara.

Udah nya, orang ke benung ngajar ngaga tanggu jam ke diatu dua iku melaki bini iya nya Diman Simboh enggau Badong Malina.

Ungkup penemu kelas ngaga kain burie tu udah berengkah dipejalai Asadia berengkah ari pun bulan Oktober ngagai November tu lalu kelas ngaga tanggu baru berengkah bulan tu nyentuk Disember bepalan ba Indu Opis Asadia Kuching di Kota Sentosa.

Suara Sarawak