Jugah Muyang

KUCHING: Penyandang penuduk Parlimen Lubok Antu, Jugah Muyang deka bediri minta pilih ngena lambang Perikatan Nasional (PN) ba Pengawa Bepilih Besai Ke-15 (PRU-15) tu.

Ba pengawa mantaika chalun PN, Chairman Kaunsil Minyak Sawit Malaysia (MPOB) nya entara tiga nama disebut Bersatu kelimpah ari Datuk Ali Biju (Saratok) enggau Duke Janteng (Bintulu).

Reti iya, Bersatu deka nurun nyabung ba tiga kelang di Sarawak kena 19 November tu.

Ba PRU-14, Jugah bediri ngena tikit Independent menang enggau majoriti 1,059 bepadan tiga penjuru ngalahka Robert Pasang Alam ari Barisan Nasional (BN) enggau Nicholas Bawin Anggat ari Parti Keadilan Rakyat (PKR).

Iya nyemilik PKR sebedau ningkilka diri ari parti nya kena 5 June 2020 lalu sekali agi nyadi Kaban Parlimen Independent ti nyukung Perintah PN enggau Gempung Parti Sarawak (GPS).

Penerang ari Jugah empu madah, iya mega madahka sukung tegut ngagai Menteri Besai Tan Sri Muhyiddin Yassin lebuh nya enggau Premier Sarawak Tan Sri Abang Johari Tun Openg.

Ku iya, kandang menua pesisir begunaka perati ari Perintah Besai dikena bejalaika pemansang dia.

Taja pia, penyarut dalam Pakatan Harapan (PH) dataika Tun Dr Mahathir Mohamad nyurutka diri ari Menteri Besai ngujungka perintah tumbang pengudah 22 bulan megai menua.

Iya mega ngaku diri berasai chukup asa meda utai ti nyadi entara parti komponen PH lebuh nya.

Nya kebuah Jugah ngaga pemutus ngatika diri pengudah minta sanding penemu enggau setuju ari bala penyukung iya ba sitak nya.

Suara Sarawak