SARATOK: Penyandang penuduk Parlimen Saratok, Datuk Ali Biju dipeda bisi pengelebih ari sukut personaliti dikerindu rayat.

Taja pia, lebuh beratika gaya pejalai Sheraton lebuh penyarut politik menua nyadi, iya entara raban ti melakangka mandat rayat.

Raban renggat baruh ti asaka pengawa Ali ti engkechit parti engka enggai ngundi iya maya Pengawa Bepilih Besai Ke-15 (PRU-15) tu.

Pemikir Politik Dick Lembang Dugun madahka bisi pekara bukai meri pengelebih ngagai Ali iya nya penegap chalun parti bukai lebih agi ari Gempung Parti Sarawak (GPS).

“Chalun ti dibantaika parti bukai udah tentu meri pangka ba sukung ngagai Ali.

“Enti sema parti bukai lebih agi GPS salah milih chalun, nya deka mai pangka besai nentuka bulih undi.

“Reti iya, enti GPS deka ngempu penuduk Parlimen Saratok, sida mesti ngirai chalun ti engkeman enggau diterima renggat baruh,” ku iya lebuh dirandau Suara Sarawak pasal pengawa berebutka penuduk angat di Saratok.

DICK LEMBANG DUGUN

Suara Sarawak