KUCHING: Chalun Gempung Parti Sarawak (GPS) Tay Tze Kok enggau chalun Parti Tindakan Demokratik (DAP) Kelvin Yii Lee Wuen ba Parlimen Bandar Kuching udah bejalaika tanggungpengawa ngundi pagi tadi.

Tze Kok datai ba palan ngundi Sekula Primari (SK) Song Kheng Hai pukul 7.35 pagi, ke alai Kelvin Yii datai ba Sekula Primari Bansa China (SJKC) Stampin pukul 9.10 pagi tadi.

Tze Kok bejalaika tanggungpengawa ngundi di SK Song Kheng Hai ditu pagi tadi.

Pengawa Bepilih Besai Ke-15 (PRU-15) bagi Parlimen Bandar Kuching ngemataka satup tiga penjuru entara chalun GPS, DAP enggau Parti Bumi Kenyalang (PBK).

Penyandang Parlimen Bandar Kuching Kelvin Yii (DAP) disatup Tze Kok (GPS) enggau Voon Lee Shan ari PBK ti bediri nguna lambang Parti Sarawak Bersatu (PSB).

Kelvin Yii bejalaika tanggungpengawa ngundi di SJKC Stampin pukul 9.10 pagi tadi.

Rambau PRU-14, Kelvin Yii menang ba Parlimen Bandar Kuching nengah 48,548 undi iya nya majoriti 35,973 undi.

Iya ngalahka chalun ari Barisan Nasional (BN) Kho Teck Wan ti semina bulih 12,575 undi.

Nitihka statistik ari Komiti Besai Pengawa Bepilih (SPR), Parlimen Bandar Kuching bisi 109,710 iku pengundi rejister.

Suara Sarawak