OPIS Menteri Utiliti udah ngagihka RM8.28 bilion dikena bejalaika 606 projek pemansang bekal ai berengkah ari 2017 nyentuk 2021.

Pengawa bejalaika projek pemansang nya ngena dua strategi dikumbai Sistem Grid Bekal Air enggau Program Bekal Ai Alternatif Sarawak (SAWAS).

Ari nya tadi, Perintah Sarawak nengah Opis Menteri Utiliti udah ngelanggur silik pemansang enggau nyendiaka agih belanja besai nentuka juluk Sarawak disambung bekal ai 100 peratus ulih dijapai.

Menteri Utiliti Sarawak lebuh nya, Datuk Sri Stephen Rundi Utom madah, 231 projek udah tembu, 227 benung dipejalai lalu 148 projek da udah ba renggat dilanggur.

Ku Rundi, bekal ai beresi selampur Sarawak naka maya iya mangku pengawa nyapai 83.4 peratus ti mungkur 99 peratus kandang mengeri seraya ba menua pesisir baru manggai 66.5 peratus.

Pelin besai Sistem Grid Bekal Ai udah digaga nitihka zon ke alai Zon Selatan dikuasa Kaunsil Ai Kuching (KWB), Zon Tengah dikuasa Kaunsil Ai Sibu lalu Zon Utara dipegai Kaunsil Ai Sitak Utara (LAKU).

Sida mega merambu begulaika semua ejensi nya nyadi siti entiti.

Reti iya, semua ejensi bekal ai di Sarawak deka diseriris di baruh siti opis dikumbai Raban Bekuasa Ai Sarawak (Sarawak Water Authority).

Pengawa begulaika semua ejensi di baruh siti perabung nya deka meri empas besai ba langgur pengawa ti mungkur semua sukut pekara. Pekara pemadu beguna maya ngena grid, mesti ngaul empat komponen besai, bepun ari pemansut ai, palan meresi ai, chara nyambung enggau prospek penguna nya empu.

Kenyau ari pun taun nyentuk tengan taun 2017, Perintah Sarawak nengah Opis Menteri Utiliti kelebih agi Opis Bekal Ai Menua Pesisir (JBALB) udah ngelala sekeda genturung ba menua pesisir enggau menua ulu ti apin disikap bekal ai beresi. Menteri Muda Utiliti (Bekal Ai) lebuh nya, Datuk Dr Hj Abdul Rahman Junaidi madah, Opis Menteri Utiliti enggau JBALB empu ngesan pengawa besai nangkup peminta perengkaguna pemun peranak dia.

Berindik ari nya, 18 genturung selampur Sarawak ari Sri Aman nyentuk Limbang udah dikelala endur ngepunka siti Program Bekal Ai Beresi kediri empu tauka dikumbai standalone project.

Semua 18 projek nya dipasuk dalam Pakej Keterubah Projek SAWAS lalu sekeda ari projek nya udah dipejalai ba Kampung Belantak di Limbang, Banting, Lingga ba sitak Bukit Begunan enggau Rumah Ado di Kakus, Tatau.

Kelimpah ari nya, projek nitika sebuah palan meresi ai beungkus RM190 ba sitak Sangan di Tatau mega udah dikemendarka Perintah Sarawak.

Projek nyambung bekal ai nengah SAWAS ngagai peranak menua pesisir diberi enggau nadai bebayar lalu ungkus bejalaika projek dipelanja penuh Perintah Sarawak.

Ambika chunto baka projek ba Kampung Belantak manggai RM4.6 juta ti dipun ujung taun 2017 lalu tembu ujung taun 2018 sereta ulih dikena Disember 2018.

Pia mega projek SAWAS dipejalai ba Banting, Lingga ti beungkus RM10 juta deka meri pemaik ngagai 11 buah rumah panjai nyengkaum 268 iku tuai bilik seraya projek sebaka ba Rumah Ado, Tatau manggai RM5 juta.

Suara Sarawak