SITI ari pemujur dijapai Perintah Sarawak ngetanka hak rayat menua tu lebuh Ubah Rang Undang-Undang (RUU) Konstitusyen (Ubah) 2022, Akta A1642 berengkah dipejalai kena 11 Februari 2022.

RUU Konstitusyen (Ubah) 2022 udah dikemendarka Yang di-Pertuan Agong Al-Sultan Abdullah Ri’ayatuddin Al-Mustafa Billah Shah kena 19 Januari 2022.

Menteri ba Opis Menteri Besai (Parlimen enggau Undang-Undang), Datuk Seri Wan Junaidi Tuanku Jaafar udah dilempai pengawa mantaika RUU nya ba Aum Parlimen kena 14 Disember 2021 lalu mujur bulih sukung majoriti dua pertiga (199 kaban).

Akta nya mungkur ubah ba Pekara 1(2), 160 (2) enggau 161A (6) enggau (7) ti dirintai seriris enggau Sempekat Malaysia 1963 (MA63).

Ubah ba RUU meri berita manah ngagai menua Sabah enggau Sarawak lalu mai nama Gempung Parti Sarawak (GPS) tampak ba Pengawa Bepilih Nengeri Ke-12 (PRU-12) laban nya entara pekara ti balat dianti rayat Sarawak.

Entara ubah dalam RUU ba Fasal (2) Pekara 1 enggau fasal 2 Pekara 160 Konstitusyen Perintah Besai tu deka nerangka penuduk nengeri di Malaysia seriris enggau pekara dituku enggau mai reti ba MA63.

Kelimpah ari nya, Perintah Sarawak mega negika Akta Konstitusyen ngagai kaban parliman mali merejuk parti bekau ari ulah sekeda kaban politik di Semenanjung Malaysia ti suah merejuk parti lalu ngeruga penegap politik menua Malaysia.

Akta Konstitusyen (Ubah) (No.3) 2022 pasal Kaban Parlimen Mali Merejuk Parti dipesetuju Yang di-Pertuan Agong kena 31 Ogos lalu digazet nyadi Akta A1663 kena 6 September tu tadi pengudah bulih majoriti sukung 209 Kaban Parlimen.

Dikemudika GPS diatu, kitai agi nagih tiga pekara besai dikena negika hak nengeri tu nengah MA63 enggau Ripot Komiti Entara Perintah (IGC).

Chairman GPS Datuk Patinggi Tan Sri Abang Johari Tun Openg lebuh aum pemberita pengudah nyadi chairman Aum Kaunsil Raban Supreme GPS madah tiga pekara tu iya nya pasal agih belanja di baruh Pekara 112D, Kort Borneo enggau aku ejensi teknikal nyadi ejensi bejalaika projek ba Sarawak.

Ku iya, pekara ti ditagih nya ngaul ubah ngagai Konstitusyen menua, laban Perintah Besai udah meri aku ngagai MA63 enggau IGC.

Iya nyemetak madah, GPS endang ngembuan siti tuju iya nya negika polisi ‘Sarawak First’ tauka ‘Ngenuluka Sarawak’ awakka sada GPS ingar agi didinga ba Parlimen.

Suara Sarawak