LANCHAR… Jematan Batang Lassa , Daro nunjukka pejalai projek nya ke benung chakah dipejalai berengkah bulan Julai 2019. Jematan sepemanjai 2.43 kilometer (km) beungkus RM598 juta nya deka ngubah gaya pemansang di Daro.

RENTAYAN jalai alun ti meruan beguna amat dikena nyungkak pemansang ba siti-siti kandang menua kelimpah ngerandang mayuh agi peluang ekonomi enggau kereja ungkup rayat dia.

Bisi 12 buah jematan selampur Sarawak digaga di baruh pegai Premier Sarawak, Datuk Patinggi Tan Sri Abang Johari Tun Openg, deka nyadi ikon enggau dikemegahka rayat Tanah Kenyalang.

Jematan nya deka ngemandakka timpuh pejalai rayat sereta nyungkak ekonomi rama menua tu.

Rayat mega enda ibuh ngena servis feri agi enti deka ngelayang sungai ke tanah seberai lalu nya udah nyamin pengelikun sida.

Projek infrastruktur penyambung udah meransang pengawa berimbaka mayuh agi tanah ukai semina ungkup betanam betupi aja tang mega dikena ngemansangka industri ba sepemanjai genturung kena pansa jalai nya.

Projek ngaga 12 buah jematan enggau ungkus manggai RM4.0 bilion nya inisiatif Perintah Gempung Parti Sarawak (GPS) dikena nyikap infrastruktur pemun ti meruan agi.

Projek nya nyengkaum Jematan Batang Lassa beungkus RM598 juta, Jematan Rambungan (RM98.5 juta), Jematan Bintulu – Jepak (RM467 juta) enggau Jematan Batang Lupar (RM848 juta).

Projek ngaga Jematan Batang Igan beungius RM286 juta, Jematan Batang Rajang (RM170 juta) enggau Jematan Batang Paloh (RM298 juta).

Projek ngaga Jematan Batang Saribas bisi dua renggat ke alai projek keterubah dikumbai Jematan Batang Saribas 1 sambung terus ke Pusa ti beungkus RM378 juta.

Udah nya, projek ngaga Jematan Kuala Saribas ngena ungkus RM385 juta dikumbai Batang Saribas 2 ti nyambung ke Roban.

Pia mega Jematan Batang Lupar 2 beungkus RM224 juta enggau Jematan Batang Krian ngena ungkus RM75 juta sereta Jematan Sungai Limbang manggai RM188 juta benung chakah dipejalai.

Pekara pemadu beguna, jematan nya udah nyadi jalai penyambung mengeri besai ba Sarawak baka Kuching, Kota Samarahan, Betong, Sarikei, Sibu, Mukah, Bintulu enggau Miri.

Ari pemisi sistem infrastruktur ti meruan nya dikearap pemansang kadang menua ngelinggi deka ulih dirumban nengah aktiviti mayuh macham ekonomi baka betanam betupi, dagang, industri enggau ke bukai.

Semina nengah sistem jalai penyambung ti meruan kelebih agi projek ngaga jematan, perintah ulih nyendiaka akses pemansang ngagai kandang menua ulu enggau menua pesisir.

Suara Sarawak