GEMPUNG Parti Sarawak ngembuan peluang ti besai ngetanka kuasa di Sarawak dalam Pengawa Bepilih Besai Ke-15 (PRU15) sekali tu.

Dekan Fakulti Sains Sosial enggau Pekara Mensia, Universiti Malaysia Sarawak (Unimas), Professor Dr Neilson Ilan Mersat madah, pekara nya engka bekau ari penyulut GPS ba Pengawa Bepilih Nengeri Ke-12 (PRN-12).

Professor Dr Neilson Ilan Mersat

“Nengah penyulut tu, GPS ulih megai kuasa nyadi ‘king maker’ ngagai parti politik bukai di Malaysia enti nadai parti bukai ti amat kering numbuhka perintah.

“Nengah pekara tu, GPS ngembuan kuasa ti beguna meri empas besai lebuh nagih pekara ti dipinta rayat Sarawak kelebih agi dalam Sempekat Malaysia 1963 (MA63),” ku iya.

Ku iya, ari sukut politik, GPS dipeda lantang laban udah nunjukka penyulut rambau PRN-12 suba lalu lambang GPS ulih narit ati pengundi.

“Nya alai, ari sukut lambang GPS nadai sebarang penanggul tauka udah ulih diterima taja pan pengundi tebal agi ngelala lambang Barisan Nasional (BN).

“Semina GPS mesti meri fokus ngulihka sukung pengundi biak ti baru bulih peluang ngundi nengah Undi 18 ti dikemendar taun tu,” ku iya.

Suara Sarawak