KUCHING: Sepenyampau 8,958 palan ngundi enggau 38,348 endur ngundi dibuka ngaul 363,515 iku staf gawa nentuka pejalai ngundi Pengawa Bepilih Besai Ke-15 (PRU-15) enggau Pengawa Bepilih Mit (PRK) Dun Bugaya, Sabah lanchar.

Sekretari Komiti Besai Pengawa Bepilih (SPR) Datuk Indera Ikmalrudin Ishak madah, sepenyampau 20,853,681 iku pengundi deka bejalaika hak sida nyadi rayat Malaysia sehari tu.

BEJALAIKA HAK… Pegawai SPR nyendiaka diri nerima penatai bala pengundi sehari tu ba Palan Ngundi ungkup sitak Parlimen Petra Jaya. GAMBAR RAMIDI SUBARI.

“SPR ngarapka semua pengundi bejalaika tanggungpengawa sida sampal nurun ngundi nitihka atur jam udah dipadah ba aplikasyen MySPR Semak.

“Enti sema pengundi enda ulih nurun ngundi baka jam udah dipadah ketegal bisi penanggul, sida agi ulih nurun ngundi nitihka pengelantang ari 7.30 pagi nyentuk 5.30 lemai (Sabah enggau Sarawak),” terang iya ba penerang kemari.

Indera mega ngelalau bala pengundi meresa baru penerang pasal pengawa ngundi nengah portal semakan ba website https://mysprsemak.spr.gov.my tauka telefon ngagai Hotline SPR ba lumur 03-88927018 / 03-88880040 tauka nengah aplikasyen MySPR Semak.

Suara Sarawak