PENGAWA MANAH… Rundi nyain plak kelai bejadika Karnival Kaul Bumai Institut Betanam Betupi Sarawak ba Kota Padawan ditu, kemari. GAMBAR GHAZALI BUJANG

KOTA PADAWAN: Manifesto dilancharka Gempung Parti Sarawak (GPS) endang realistik tauka pengawa ulih dipejalai, ku Datuk Dr Stephen Rundi Utom.

Iya ti nyadi Mandal Presiden Kanan Parti Pesaka Bumiputera Bersatu (PBB) madah, semaya nya endang ulih dikeamatka GPS.

“Beratika manifesto digaga lebuh Pengawa Bepilih Besai Nengeri Ke-12 (PRN-12) suba, udah nya semaya nya ulih dikeamat enggau menyana.

“Nya alai ba Pengawa Bepilih Besai Ke-15 (PRU-15) mega tentu ulih dikereja laban tuju nadai jauh bida.

“Kitai nadai ngumbai manifesto tu bup kubus, nya kebuah enda ulih besemayaka bulan enggau bintang dikena nginti sukung rayat,” ku iya.

Rundi mansutka penemu nya ba aum pemberita pengudah bejadika Karnival Kaul Bumai Institut Betanam Betupi Sarawak, ditu kemari.

Iya madah baru, manifesto GPS nyelinting pengelantang rayat enggau pemansang Sarawak, nya kebuah utai disemaya ulih dikeamat.

Suara Sarawak