KUCHING: Perintah Sarawak benung ngemansangka 2,510 hektar tanah baru endur bumai padi kelimpah ngidupka baru umai ke bisi diatu.

Menteri Industri Pemakai, Komoditi enggau Pemansang Kandang Menua Sarawak, Datuk Sri Dr. Stephen Rundi Utom madahka nya dikena nambahka asil berau.

Ku iya, nya mega ngambi kitai enda kelalu bepanggai ba import berau ungkup timpuh panjai.

“Ari 150,000 hektar tanah ti manah endur bumai padi ba Sarawak, nyau kusut ngagai -kira 83,000 hektar aja ba 2021.

“Nya alai, 1,600 hektar tanah baru dikemansang baka 80 hektar ba Kampung Mujat, Serian enggau ungkus RM4.5 juta dipelaba ditinda 2023.

“Siti da tanah udah dikelala ulih endur bumai iya nya Selepong-Panggil, Sri Aman ti deka dikemansang berenggat lalu dipelaba bepun enggau 600 hektar.

“Udah umai tembu dikereja jemah, iya dikeandal mansutka asil belipat, iya nya 5,400 tan metrik padi ninting taun,” terang iya.

Rundi ti mega Adun Kemena mansutka perambu nya ba simpul jurai Opis Menteri Industri Pemakai, Komoditi enggau Pemansang Kandang Menua Sarawak rambau Aum Ketiga Penggal Keterubah Dun Sarawak Ke-19, ditu tadi.

Iya madah, pia mega Projek Jelapang Padi Batang Lupar ti dikemansangka Sitak Pemansang Begulai (IADA) Batang Lupar – ngemansangka infrastruktur besai ba Lingga-Banting benung chakah dipejalai.

Suara Sarawak