MODAL MENSIA… Abang Johari begambar ungkup kenang enggau bala nembiak
lebih ngintu Hari Nembiak Renggat Nengeri Sarawak.

PERAMBU Rang UndangUndang Wang Turu Pesaka ti deka dibantai ba Aum Kunsil Nengeri enda lama agi dikeandal meri empas ti manah ngagai Sarawak ba timpuh 20 taun deka datai.

Premier Sarawak Datuk Patinggi Tan Sri Abang Johari Tun Openg madah, wang turu nya mungkur belanja ti digazet enggau turu ari sukut pemansang ekonomi dudi hari.

“Tu deka ngasuh kitai ulih meri bantu ba sukut pelajar nembiak ngagai renggat universiti, raban ti deka ngasaika pemaik ari wang turu tu iya nya raban biak.

“Kelimpah ari nya, pejalai Sarawak ngalih ngagai teknologi baru bechuanka teknologi deka ngerandang mayuh pengawa puang enggau gaji ti besai,” ku iya.

Abang Johari madah baru, nembiak rebak baru patut jauh tinjau penemu ba mayuh bengkah pengawa dikerembai ba Sarawak nyengkaum petrokimia, betanam betupi moden enggau ke bukai. “Perintah engka deka nyendiaka peluang pengawa ti begaji besai ari penyampau pemeranak puku ti majak nambah ba pemansut kuasa hidrogen.

“Hidrogen begunaka orang bepenau ba pekara biokimia, juluk Sarawak dikena nambahka penatai pemisi rayat.

“Enti sema polisi tu mujur, aku pechaya orang biak ti deka bulih penguntung,” ku iya.

Ngelansa 120 inisiatif ti dipejalaika iya, Abang Johari madahka diri bisi pengandal besai ngagai pemujur Sarawak jemah.

“Semua menua dalam dunya bebendar ngiga penatai kuasa gadung, aku baru pulai ari Singapore bejaku pasal green energy ba mua 10,000 iku raban ti anda ba pekara tu.

“Kitai chukup betuah laban menua kitai ngembuan mayuh pemansut ai, hidrogen, solar nyentuk mikro lukut.

“Semua pemansut tu ulih mansutka kuasa gadung ti tegap, nya kebuah genap pemeranak puku kitai ila deka bepanggai ba kuasa ulih dikemaru,” ku iya.

Suara Sarawak