Nicholas Kudi Jantai

KUCHING: Perintah Sarawak dikeandalka ulih meri bantu Belanja Khas ngagai sektor betanam betupi ba menua tu dikena ngelempungka tating belanja peranak menua pesisir.

Adun Baleh, Nicholas Kudi Jantai madah, pekara nya ulih mantu nambahka penatai pemisi raban orang bumai ba menua pesisir kelebih agi peranak ba sitak Dun Baleh.

“Peranak menua tu tebal agi beridup ari asil betanam betupi baka padi bukit enggau betanam sayur kelimpah ngasu enggau berikan ba sungai.

“Pengidup sida ba menua pesisir ulih diubah nyema tanah pesaka di menua sida diguna ungkup ngatur sektor betanam betupi ti betusun enggau ti diperambu meruan.

“Tang dalam gaya ekonomi ti enda tentu diatu, raban orang bumai berasai ditating laban rega rachun enggau baja ti kelalu mar, nya alai aku merambu Perintah Nengeri meri bantu Belanja Khas ungkup sektor betanam betupi sida di menua pesisir,” ku iya.

Nicholas bejaku munyi nya lebuh ngambi bagi nyukung Bajet 2023 ti dibantaika Premier Sarawak Datuk Patinggi Tan Sri Abang Johari Tun Openg ba hari ti keterubah Aum Ketiga Penggal Keterubah Kunsil Nengeri (Dun) Sarawak Ke-19 di Dun Sarawak ditu, kemari.

Suara Sarawak