NGAUL KOMUNITI… Soon Koh nguji nasak mi kampua lebuh bejalai kimpin ba sebuah palan bedaja di Sibu kemari.

SIBU: Pemutus ex-Kaban Parlimen Lubok Antu, Datuk William Nyallau Badak ningkilka diri ari Parti Sarawak Bersatu (PSB) nadai pulaika penanggul ngagai parti nya.

Presiden PSB, Datuk Sri Wong Soon Koh madahka pemutus Nyallau nya kebendar meri ‘pemaik’ ngagai parti sida.

“Iya semina deka ‘ngeribat’ parti enti enda ningkilka diri tumu. Pengelenyau iya nadai ngeruga sukung diterima kitai ba Parlimen Lubok Antu.

“Kebuah pia laban chalun kitai ti mega Adun Engkilili Dr Johnichal Rayong Ngipa endang regas enggau bagas gawaka rayat ngelama tu.

“Ulah Nyallau tu enda ngasuh kami mantul ati ngerebut penuduk parlimen tu ba Pengawa Bepilih Besai Ke-15 (PRU-15) tu,” ku iya nyemetak.

Ku Soon Koh, Dr Rayong udah mayuh nyukung enggau mantu Nyallau menang ba penuduk Parlimen Lubok Antu lebuh PRU-13 (2013) suba.

Iya madah baru, Nyallau ulih menang ba Pengawa Bepilih Besai Nengeri (PRN) nyin tadi ngena tikit PSB ba sitak Dun Batang Ai.

“Tang Nyallau lenyau nadai temu penunga kelimpah nadai bebendar gawa ngambi menang bediri minta pilih lebuh nya.

“Kami meri belanja kena iya bejalaika pengawa tang udah alah, iya lalu lenyau nadai temu penunga,” ku Adun Bawang Assan nya nerang.

Ba lansa sama, Soon Koh madahka diri apin nerima surat ari Nyallau ti madahka iya ningkilka diri ari parti nya.

Suara Sarawak