Perintah begulai engka deka numbuhka perintah baru Malaysia
NERANG… Abang Johari bejaku lebuh mantaika pemutus PRU-15 Sarawak ba Palan Aum Borneo Kuching (BCCK), malam tadi.

KUCHING: Premier Sarawak, Datuk Patinggi Tan Sri Abang Johari Tun Openg ngadang perintah begulai deka numbuhka perintah baru Malaysia.

Ku Abang Johari, naka diatu bedau bisi gempung parti bukai nanya iya pasal pekara nya.

Iya ngadang pekara tu berindik ari pengawa ngira undi ba Pengawa Bepelih Besai Ke-15 (PRU-15) tu bedau tembu dipejalai kelebih agi ba Semenanjung Malaysia.

“Aku nadai nerima penerang ari bakih kitai di Semenanjung tang aku ngadang perintah begulai deka ditumbuh,” ku iya.

Abang Johari mansutka jaku nya ba aum pemberita pengudah mantaika pemutus PRU-15 Sarawak ba Bilik Operasyen Gempung Parti Sarawak (GPS) ba Palan Aum Borneo Kuching (BCCK), malam tadi.

Ngelansa silik pasal pangku pengawa Sapit Menteri Besai (TPM) ti deka diberi ngagai tuai Sarawak enggau Sabah ba PRU-15, iya madah, GPS semina deka bisi kuasa nitihka pematut.

“Baka ti kala dipadah aku ngelama tu, GPS semina minta kuasa. Taja pen bisi TPM tang enti nadai kuasa, nadai meh guna.

“Kitai ngemeratka pekara pasal MA63… Tang enti sida deka meri nama kebuah kitai enggai? Anti aja dulu, kitai bedau numbuhka Perintah Besai lalu sida apin nanya aku,” ku iya.

Sebedau tu, Barisan Nasional (BN) enggau Pakatan Harapan (PH) meri slot pangku pengawa TPM ngagai tuai Sarawak enggau Sabah enti gempung nya mujur numbuhka perintah ba PRU-15.

 

Suara Sarawak