KABONG: Peranak di Kabong deka ngasaika empas pemansang pengudah sekeda projek pemansang ba kandang menua nya kelebih agi projek Nangkir Genturung Pendiau (SPK) Pasar Baru Kabong dipejalaika taun baru.

Premier Sarawak Datuk Patinggi Tan Sri Abang Johari Tun Openg madahka iya empu deka datai ke Kabong laban deka meda projek ti dikemendarka sebedau tu udah datai ba tikas ni.

“Keterubah, penanggul bekal ai di Kabong udah diputarka taja sekeda projek agi ba renggat dipejalai.

“Udah nya, projek Pasar Baru Kabong, pejalai projek tu pen agi dipejalai enggau SPK ti agi benung ba renggat nimbuk tanah,” ku iya.

NERANG… Abang Johari bejaku ba Program Tuai Begulai enggau Rayat di Palan Bedaja Kabong ditu, kemari.

Abang Johari bejaku munyi nya rambau Program Tuai Begulai enggau Rayat di Palan Bedaja Kabong ditu, kemari.

Ku iya, udah tanah ba palan nya ditimbuk perintah deka nyikap perengkaguna pemun.

“Tang tanah ditu tanah kerapa, lebuh ditimbuk mesti dilak lama endur tanah nya landai.

“Udah nya baru kitai ulih ngaga parit, nyendiaka bekal ai enggau ke bukai sebedau kitai ngaga rumah.

“Ungkus nimbuk tanah tu aja udah mar, tambah mega kitai deka ngaga jalai alun ari genturung C ke pasar,” ku iya.

Iya mega madah, semua pemansang dibai perintah tu endang dipelanja Perintah Gempung Parti Sarawak (GPS).

“Lebuh rumah ti deka digaga nya nitihka langkar kitai empu, rayat ditu semina mayar rega rumah ninting bulan aja.

“Rega tanah, rega nimbuk tanah enggau ke bukai nya semua nadai dibayar.

“Laban kitai nemu raban B40 enggau M40, orang berikan tauka orang bumai semua beguna duit, kita semina mayar rega rumah ninting bulan aja,” ku iya.

Pekara tu ku iya, dikemanahka agi enggau polisi perintah ti meri deposit rumah RM10,000.

“Kelebih agi sida ti beumur 27 enggau 28 taun, ti baru nirika rumah tangga, kitai nemu sida beguna duit laban baru bisi ruang bilik.

“Kekadang penatai pemisi kurang, tang rayat endang deka bisi rumah kediri, ari nya kitai mantu sida meri deposit rumah RM10,000.

“Nyadi, bayar rumah nya ninting bulan urung RM200 ke RM250 sebulan enti sida ngaga jali 30 taun laban umur sida maya meli rumah agi biak,” ku iya.

Ku Abang Johari, pekara pemun baka tu endang ngenukuka rayat lalu iya melaba deka numbuhka skim SPK kedua ba palan nya berindik ari peminta rayat dia.

“Palan bukai pen bisi digaga kitai baka tu, lalu kitai meri perati lebih ngagai palan di menua pesisir.

“Pemadu beguna menua kitai mesti likun, beserakup enggau tegap aja,” ku iya.

Suara Sarawak