KENYAU lima taun ti udah, penuduk belanja Sarawak tegap taja mayuh projek pemansang dikinsil lebuh Perintah Besai dipegai perintah Pakatan Harapan (PH).

Premier Sarawak Datuk Patinggi Tan Sri Abang Johari Tun Openg madah, nya nyadika lalau pemadu beguna ngagai menua tu ngambi bediri tegap ngatika diri.

“Enti kitai bisi perintah ti tegap baka diatu, Putrajaya deka ninga sada peminta menua kitai, nya kebuah mandat rayat beguna endar.

“Kitai kala ngasai dipegai PH pengelama 22 bulan, manifesto semina tinggal manifesto aja, ujung-ujung sida madahka manifesto nya ukai Bup Injil,” ku iya.

Abang Johari madah, gaya politik enggau ekonomi enda tentu sekumbang dipegai PH ngujungka Sarawak ngiga jalai enggau chara pemansang kediri.

“Diatu pemansang dipejalaika kitai empu, baka projek jematan, bekal ai enggau bekal kuasa karan ditampung ngena belanja kitai empu.

“Ba manifesto PH suba, sida madah agih penatai pemisi dikunsi sebela entara Sarawak enggau Perintah Besai nitihka agih 40 peratus.

“Kedua, sida besemaya 20 peratus asil minyak diagihka Sarawak, lalu ketiga kuasa otonomi deka diberi ngagai Sarawak,” ku iya.

Taja pia ku Abang Johari, semua nya nyau puntan pengudah mayuh projek ba Sarawak dikinsil PH nyengkaum projek Jematan Batang Lupar, Jematan Rambungan enggau ke bukai.

“Nyentuk pemansang sekula pan sida mayuh dalih, enggai enda dipanjar.

Laban betatika pekara pelajar enggau infrastruktur pemun beguna, aku madah ngagai sida (PH), au meh kami mayar RM1 bilion.

“Udah diberi pan pejalai pemansang ba dua pekara tu agi lubah, tu meh utai ti nyata nyadi,” ku iya.

Nya alai, rambau Pengawa Bepilih Besai Ke-15 (PRU-15) tu, Abang Johari andalka Sarawak ulih nyapai penyulut besai ba semua 31 penuduk parlimen di Sarawak.

“Enti diperati ari penyulut ba Pengawa Bepilih Nengeri Ke-12 (PRN-12) kitai mujur ngempu 76 penuduk ari 82, aku pechaya kitai mega deka bulih mandat ari rayat.

“Sada kitai mesti nyarih didinga ba parlimen ngambi ulih negika hak enggau minta agih pemansang sebela nipakka Sempekat Malaysia 1963 (MA63),” ku iya nyemetak.

Suara Sarawak