Gambar fail

Serikat kuasa nengeri, Sarawak Energy madahka SARES ngena pemansut kuasa ulih dikemaru baka panchar panas enggau hidro-mikro ba menua ulu Sarawak.

Nya siti inisiatif di baruh Pelin Besai Elektrifikasi Menua Pesisir Sarawak ti mujur ngemesaika bungkur bekal kuasa karan manggai 93 peratus penyampau tubuh peranak menua tu naka taun 2020.

Inisiatif begulai perintah nengeri ti disukung Sarawak Energy keran deka nyendiaka bekal kuasa karan 24 jam nengah pemansang teknologi kuasa alternatif. Sida keran nyikap sitak menua pesisir enggau menua ulu ti naka pemar enggau begunaka timpuh ti lama endur disambung ngagai grid elekterik besai, ngena perengkaguna pemun nya.

Pemujur pemadu baru dijapai nengah SARES ti udah dipejalai ba empat buah rumah panjai di Sebauh, siti pelilih menua ulu kena pegai Bagi Menua Bintulu.

Pengawa bejadi enggau nyerahka sistem nya mega udah dipenyadika Menteri Utiliti Sarawak lebuh nya, Datuk Seri Dr Stephen Rundi Utom. SARES tau dikumbai tepa tauka pemeri Perintah Sarawak ngagai peranak menua pesisir ti nadai akses ti sebaka enggau sida ti diau ba mengeri.

Ngena sistem nya mega, genap ruang bilik disikap ngena bekal kuasa karan 3,000 watt sejam lalu ulih dikemaru, meri penampak enggau kuasa ti chukup kena ngidupka kereban diguna ba rumah.

Nengah Pelin Besai Elekterifikasi Menua Pesisir Sarawak, Perintah Sarawak ngagihka RM2.37 bilion ungkup timpuh 2019- 2020 dikena ngerumban projek nipakka tagit nyapai bungkur bekal kuasa karan 100 peratus datai ba taun 2025.

Ba Bagi Menua Bintulu, SARES udah disambung ngagai 17 genturung pendiau ba Sebauh enggau 18 genturung pendiau ba Tatau, meri penampak ngagai 607 ruang bilik tauka 3,300 iku peranak.

Suara Sarawak